Tauqeer Taqi

badan men ruuh ki tarsil karne vaale log
badal ga.e mujhe tabdil karne vaale log

ruuTh kar aankh ke andar se nikal jaate hain
ashk bachchon ki tarah ghar se nikal jaate hain

main tire hijr se niklunga to mar ja.unga
haa.e vo log jo mehvar se nikal jaate hain

jaise viran haveli men hon khamosh charagh
ab guzarti hain tire shahr men shamen aisi

sabz peDon ko pata tak nahin chalta shayad
zard patte bhare manzar se nikal jaate hain

phenk de khushk phuul yadon ke
zid na kar tu bhi be-vafa ho ja

kal jahaan divaar hi divaar thi
ab vahaan dar hai jabin hai ishq hai

yahin aanaa hai bhaTakti hui aavaazon ko
yaani kuchh baat to hai koh-e-nidaa mein aisi

ab zamaane mein mohabbat hai tamaashe ki tarah
is tamaashe se bahaltaa nahin tu bhi main bhi

daaman bachaa rahe the ki chehra bhi jal gayaa
kis aag se guzar ke tiri raushni mein aae

hijr thaa baar-e-amaanat ki tarah
so ye gham aakhiri hichki se uThaa

lafz ki qaid se rihaa ho jaa
aa miri aankh se adaa ho jaa