ab zamaane mein mohabbat hai tamaashe ki tarah — Tauqeer Taqi

kal jahaan divaar hi divaar thi
ab vahaan dar hai jabin hai ishq hai

yahin aanaa hai bhaTakti hui aavaazon ko
yaani kuchh baat to hai koh-e-nidaa mein aisi

daaman bachaa rahe the ki chehra bhi jal gayaa
kis aag se guzar ke tiri raushni mein aae

hijr thaa baar-e-amaanat ki tarah
so ye gham aakhiri hichki se uThaa

badan mein dil thaa muallaq khalaa mein nazrein thiin
magar kahin kahin siine mein dard zinda thaa

lafz ki qaid se rihaa ho jaa
aa miri aankh se adaa ho jaa

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

ji churaane ki nahin shart dil-e-zaar yahaan
ranj uThaane hi ki Thahri hai to phir dil se uThaa

ishq mein ain hunar-mandi hai
sab jise be-hunari kahte hain

chale ho dasht ko 'naazim' agar mile majnun
zaraa hamaari taraf se bhi pyaar kar lenaa

phir nahin mere sivaa koi bhi hotaa teraa
tu agar jaan ye jaataa ki mohabbat kyaa hai