aish-aagaah gham-shanaas rahaa — Ahmar Gorakhpuri

"numaaish-e-rukh-e-rangin-e-yaar rahne de mujhe na chheD gul-e-nau-bahaar rahne de asir-e-panja-e-gesu-e-yaar rahne de mire nasib mujhe be-qaraar rahne de fareb-khurda-e-rang-e-bahaar rahne de jo daagh-daar hai dil daagh-daar rahne de abhi na hosh mein laa ai mire nasib Thahar karam-numaai-e-daamaan-e-yaar rahne de abhi javaan hain vo ai ghurur-e-husn bataa samand-e-naaz pe un ko savaar rahne de uThaa na ab mujhe uTh uTh ke mere dard-e-jigar paDaa huaa huun sar-e-ku-e-yaar rahne de khiraam-e-naaz ke sadqe tire o mast-e-shabaab miTe huon ke nishaan-e-mazaar rahne de kuchh un ke dil pe asar ho chalaa hai ai gham-e-ishq miri mizha ko abhi ashk-baar rahne de tiri vafaaein bhi to be-hisaab hain 'ahmar' kisi ke zulm-o-sitam kaa shumaar rahne de"

"chaman mein phulon kaa daamaan-e-taar-taar bhi dekh bahaar dekh chukaa haasil-e-bahaar bhi dekh asir-e-subh-e-tarab shaam-e-sogvaar bhi dekh guzarte lamhon kaa ik aur shaahkaar bhi dekh mah-o-nujum ke jalvon se khelne vaale fazaa mein phailaa huaa rang-e-intishaar bhi dekh tire khayaal se aage tiri nazar se pare jo pal rahe hain vo lamhaat-e-khalfishaar bhi dekh nikal ke marmarin mahlon ke sard-khaanon se tapaa tapaa saa gharibon kaa reg-zaar bhi dekh bahaar ghuncha-o-gul se nazar haTaa ke zaraa sisakti qaum ke zakhmon kaa laala-zaar bhi dekh ba-naam-e-amn liye aslahon ke daaman se jo uTh rahaa hai vo tufaan-e-shoala-baar bhi dekh lahu lahu hai jahaan jism-e-aashti 'ahmar' sitam-rasidon kaa vo khun-chakaan dayaar bhi dekh"

"khel kar silsila-e-gardish-e-ayyaam ke saath zindagi ham ne guzaari baDe aaraam ke saath sun rahaa huun dil-e-barbaad ke afsaane mein aap kaa naam bhi aaya hai mire naam ke saath shukr-sad-shukr ki muddat pe tujhe shikva-taraaz yaad to aaya koi saikDon ilzaam ke saath kam-nigaahi se tiri bazm-e-tarab mein saaqi dekh aankhein na chhalak jaaein kahin jaam ke saath teri yaadon mein guzarte hue lamhon ki thakan lutf-e-aaghaaz bhi laai gham-e-anjaam ke saath baDhtaa jaataa hai ujaalon pe andheron kaa asar subh badnaam na ho jaae kahin shaam ke saath is zamaane mein gale milte hue dekhaa hai ravish-e-khaas ko ham ne ravish-e-aam ke saath ham bhi khele hain lab-e-shaahid-e-mai se 'ahmar' jura-kash ham bhi rahe hain kabhi 'khayyaam' ke saath"

"rahte nahin qaabu mein sar-e-raahguzar paanv rakhte hain idhar paanv to paDte hain udhar paanv kaandhon pe liye umr kaa bosida janaaza jaataa hai udhar jism bhi jaate hain jidhar paanv maahaul hi aaina-e-har-ahd-e-navi hai jhule hi mein aa jaate hain bachche ke nazar paanv baDh jaate hain kuchh aur bhi manzil ke taqaaze kho dete hain jab hausla-e-azm-e-safar paanv paamaal hue hain kai sahraaon ke siine yunhi nahin aate hain nazar khaak-basar paanv har chand baDhi jaati hai lamhon ki masaafat thakte nahin baDhte hue sadiyon ke magar paanv milti nahin gar zehn ko idraak ki aankhein rakhte hi nahin farsh pe mahrum-e-basar paanv shahron ki tijori kabhi deti nahin roTi kheton mein pahunchte nahin dahqaan ke agar paanv sidhi sahi lekin rah-e-ikhlaas pe 'ahmar' paDte hain zamaane ke ba-andaaz-e-digar paanv"

"thi khvaab mein bhi jalva-numaai tamaam raat niind aai bhi to niind na aai tamaam raat samjhaa na dil ne ahd-shikan tujh ko taa-sahar kartaa rahaa adu ki buraai tamaam raat tum se to khair vaada-khilaafi hui hui kam-bakht maut bhi to na aai tamaam raat hichki bataa rahi thi ki us bevafaa ko bhi meri hi tarah niind na aai tamaam raat khalvat-gah-e-talab mein ujaalaa na ho sakaa lau shama-e-aarzu ki baDhaai tamaam raat jab ho sakaa na koi mudaavaa-e-soz-e-ishq ashkon ne gham ki aag bujhaai tamaam raat rah rah ke dard uThtaa rahaa aur chashm-e-shauq apne hi aansuon mein nahaai tamaam raat 'ahmar' milaa thaa jis se hamein dard-e-aashiqi dete rahe usi ki duhaai tamaam raat"

"naghma-haa-e-asar-andaaz kahaan se laaun soz mein Duubaa huaa saaz kahaan se laaun be-kasi hamdam-o-hamraaz kahaan se laaun gham mein Duubi hui aavaaz kahaan se laaun ishq ne jis ke liye qais kaa jaama pahnaa husn-e-khud-bin ke vo andaaz kahaan se laaun uf vo duzdida nigaahon ke hasin nazzaare uf vo tere ghalat-andaaz kahaan se laaun maut hai mere liye talkhi-e-anjaam-e-hayaat tujh ko ai lazzat-e-aaghaaz kahaan se laaun sunne vaalon ko jo khud-rafta kare ai 'ahmar' apne sheron mein vo eajaaz kahaan se laaun"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kyaa apne shahr mein koi aisaa makaan hai samjhun jise ki asl mein vo ik jahaan hai DhunDo haqiqat is mein na afsaana hi koi is kaa bayaan kuchh nahin us kaa bayaan hai apnaa shi'aar ab hai faqat amn-dushmani ye aur baat faakhta apnaa nishaan hai likhne ko ek harf na kahne ko ek lafz yuun to qalam hai haath mein munh mein zabaan hai vo lams jis ke baa'd zamaane guzar gae vo lams ab bhi taaza hai ab bhi javaan hai ho jaaegaa yaqin sabhon kaa hi kal jo aaj meraa yaqin aur sabhon kaa gumaan hai shatranj ki bisaat ki thi apni mez par shatranj ki bisaat ki saaraa jahaan hai"

"charaaghon se kuchh to churaayaa gayaa hai jo thi aag us ko bujhaayaa gayaa hai likhaa thaa jinhein sirf apne lahu se mire un khaton ko jalaayaa gayaa hai hazaaron daf'a us ne ki bevafaai mujhe bevafaa kyon bataayaa gayaa hai mujhe khud nikalnaa paDaa apne ghar se ye mat sochnaa ki bhagaayaa gayaa hai khabar ye mili hai ki mere hi ghar mein kisi ghair ko ab basaayaa gayaa hai mujhe hi sataa kar mujhe hi rulaa kar ye ilzaam mujh par lagaayaa gayaa hai tumhein kyaa bataaun mohabbat mein 'raavat' mujhe kis qadar aazmaayaa gayaa hai"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"