dard-e-dil bhi kabhi lahu hogaa — Sahir Hoshiyarpuri

"khvaab dekhe the suhaane kitne jaag uThe dard puraane kitne ek jalve ki faraavaani se ban gae aaina-khaane kitne chaal se haal ki laate hain khabar log hote hain siyaane kitne buujh kar bhi na bataaun tujh ko teri muTThi mein hain daane kitne be-iraada jo hue ashk-e-ravaan luT gae gham ke khazaane kitne tum zaraa ruuTh ke dekho to sahi log aate hain manaane kitne ham ne sirf ek tabassum ke liye zakhm khaae hain na jaane kitne Duub marne kaa nahin koi javaaz zinda rahne ke bahaane kitne sard-mehri se tiri mahfil mein jal-bujhe log na jaane kitne yaad-e-maazi se simaT aae hain ek lamhe mein zamaane kitne ik nazar dekhaa thaa us ne 'saahir' gaDh liye dil ne fasaane kitne"

"ranj-o-aalaam se mohabbat hai sai-e-naakaam se mohabbat hai zindagi-bhar na ho sahar jis ki ham ko us shaam se mohabbat hai kyaa khatar gardish-e-falak se hamein gardish-e-jaam se mohabbat hai baada sahbaa sharaab se daarad aise har naam se mohabbat hai baada-o-jaam se mohabbat thi baada-o-jaam se mohabbat hai har ghaDi dil mein yaad hai un ki bas usi naam se mohabbat hai un mein shaan-e-khudaa hai jalva-fagan ham ko asnaam se mohabbat hai dushman-e-jaan hai ye mohabbat bhi said ko daam se mohabbat hai qadr-e-isaar kyaa vo samjheinge jin ko anjaam se mohabbat hai us ki tashrih kyaa ho ai 'saahir' dard-e-be-naam se mohabbat hai"

"tairegaa fazaa mein jo samundar na milegaa dil saa bhi zamaane mein shanaavar na milegaa saahil se to andaaza-e-tufaan bhi hai dushvaar tah mein jo na utroge to gauhar na milegaa vaabasta hai is bazm se hi ghar kaa tasavvur uTh jaaegi jab bazm to phir ghar na milegaa parvaaz khalaaon mein mubaarak tumhein lekin ik baar bikhar kar to ye paikar na milegaa sar phoDne vaale rahein vallaah salaamat kuchh din mein ibaadat ko bhi patthar na milegaa har zarra hai firdaus-e-nazar had-e-nazar tak bedaar na honaa ki ye manzar na milegaa sairaab jo hain un ki havas aur baDhi hai is bhiiD mein pyaason ko samundar na milegaa tum lutf-e-mulaaqaat ko khvaabon mein basaa lo ye lamha masarrat kaa bichhaD kar na milegaa har sher mein izhaar se ehsaas ham-aaghosh is daur mein 'saahir' saa sukhan-var na milegaa"

"Taalne se vaqt kyaa Taltaa rahaa aastin mein saanp ik paltaa rahaa maut bhi leti rahi apnaa khiraaj kaarobaar-e-zist bhi chaltaa rahaa koi to saancha kabhi aaegaa raas main har ik saanche mein yuun Dhaltaa rahaa shahr ke saare mahal mahfuz the teraa meraa aashiyaan jaltaa rahaa zindagi mein aur sab kuchh thaa hasin apnaa honaa hi mujhe khaltaa rahaa bujh gae tahzib-e-nau ke sab charaagh ek miTTi kaa diyaa jaltaa rahaa aarzuein khaak mein milti rahin nakhl-e-ulfat phultaa phaltaa rahaa ban ke sone kaa hiran teraa vajud mere mahsusaat ko chhaltaa rahaa raat bhar suuni rahi birhan ki sej aur aangan mein diyaa jaltaa rahaa zikr-e-haq bhi thaa bajaa 'saahir' magar mai-kashi kaa daur bhi chaltaa rahaa"

"vo jis ko ham ne apnaayaa bahut hai usi ne dil ko taDpaayaa bahut hai hamaare qatl ki saazish ke darpai hamaaraa nek ham-saaya bahut hai dil-e-dard-aashnaa shauq-e-shahaadat mohabbat mein ye sarmaaya bahut hai ajab shai hai chaman-zaar-e-tamannaa samar koi nahin saaya bahut hai khataa us ki nahin dil ko hamin ne tamannaaon mein uljhaayaa bahut hai khudaa mahfuz rakhe aasmaan ko zamin ko is ne jhulsaayaa bahut hai tiri yaad aai hai to aaj ham ko dil-e-gum-gashta yaad aayaa bahut hai ba-naam-e-hazrat-e-naaseh bhi ik jaam ki us ne vaaz farmaayaa bahut hai na kyuun Thukraaein ham duniyaa ko 'saahir' hamein bhi us ne Thukraayaa bahut hai"

"duniyaa mein har qadam pe hamein tirgi mili dekhaa jo apne dil ki taraf raushni mili ulfat mili khulus milaa dosti mili har dil mein ham ko apni hi tasvir si mili naagaah jaise bichhDaa huaa ham-safar mile gham mil gayaa to dil ko baDi taazgi mili shaayad miri talaash kaa maqsad hi thaa ghalat aavaaz di khirad ko to divaangi mili hai apni zindagi ki ye tafsir-e-mukhtasar gham mustaqil milaa to khushi aarizi mili jo ho chalaa thaa dil ko sukun un ke hijr mein vo mil gae to phir use vaaraftagi mili ishrat-kada hai dahr magar shaikh ke liye ham ko to ik ghaDi bhi na aaraam ki mili vo aur honge pi ke jo sarshaar ho gae har jaam se hamein to nai tishnagi mili jaagir apni shaaeri pahle se thi magar ik umr jab riyaaz kiyaa saahiri mili"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"