fasaana-e-gham-e-dil mukhtasar nahin hotaa — Khalid Hasan Qadiri

"kuchh na khat mein na kuchh javaab mein hai jo bhi kuchh hai tire hisaab mein hai ye vafaa bhi jafaa ke baab mein hai jaan meri bhi ik azaab mein hai tere jalve se mehr-e-aalam-taab nuur jis tarah maahtaab mein hai apni hai aur manzil-e-maqsud aap kaa kucha paaturaab mein hai kuchh na samjhe haqiqat-e-aalam saaraa hangaama ek khvaab mein hai tum ne kyaa baat raat kah di thi ghair bhi aaj iztiraab mein hai rashk-e-ishrat hai lazzat-e-hasrat kuchh gunah mein hai ne savaab mein hai hosh aaegaa ab qayaamat ko saari duniyaa abhi to khvaab mein hai jab se vaada kiyaa hai aane kaa 'qaadri' un ke roab-o-daab mein hai"

"aadmi bhi aadmi kaa raazdaan hotaa nahin be khabar rahtaa hai lekin bad-gumaan hotaa nahin zahmatein yaksaan makaan-o-laa-makaan se kyaa huaa kyaa khalaaon se pare bhi aasmaan hotaa nahin ham ki khud rah-rav bhi hain rahbar bhi hain rahzan bhi hain vaan pahunchte hain jahaan par kaarvaan hotaa nahin baDh gae ikhvaan-e-yusuf se ye ikhvaanus-safaa pheink dete hain vahaan jis jaa kuaan hotaa nahin hai jaraahat-aafrin darmaan-e-dard-e-laa-davaa shoala kartaa hai sharar-baari dhuaan hotaa nahin husn-e-be-pardaa harif-e-taab-e-nazzaara nahin ho nazar ke saamne lekin ayaan hotaa nahin marg-e-be-hangaam apne shahr kaa maamul hai log mar jaate hain koi nauha-khvaan hotaa nahin jo bhi ho jis haal mein hai zindagi us ko aziiz jaan-e-jaan kahne se kuchh jaan-e-jahaan hotaa nahin be-adaa-kaari bhi khaamoshi se mar jaate hain log yaan pe koi khel mirzaa saahebaan hotaa nahin"

"mere aaine mein tum surat-e-zebaa dekho tum ne ab tak jo na dekhaa ho vo jalvaa dekho ik jahaan daavat-e-nazzaara hai kyaa kyaa dekho husn-e-didaar-talab kaa bhi tamaashaa dekho jaagti aankhon ke khvaabon ki bhi taabirein hon khvaab kal raat jo dekhaa thaa adhuraa dekho hai vahi maulaa vahi apnaa vakil aur nasir tum yahud aur nasaaraa kaa sahaaraa dekho kurra-e-arz bhi mehvar se haTaa jaataa hai be-jahat husn kaa ik ye bhi tamaashaa dekho surma-e-shams-o-qamar raahat-e-chashm-e-nargis dil-e-binaa se hi kaifiyyat-e-fardaa dekho kahkashaan luuT di hai haath baDhaa kar ham ne ab khalaa se bhi pare jaa ke ujaalaa dekho ham khalaaon se bhi angaare lapak lete hain kis jagah girtaa hai TuuTaa huaa taaraa dekho nai duniyaa mein nae chaand sitaare laao 'qaadri' ne bhi lagaayaa hai ye shosha dekho"

"buton se kuchh na huaa jo huaa khudaa se huaa davaa se kuchh na banaa jo huaa du'aa se huaa bharam daraazi-e-daamaan-e-yaar kaa na rahaa ajiib kaam mire dast-e-naa-rasaa se huaa dilon ko sabr-o-sukun to na mil sakaa lekin koi to kaam tiri chashm-e-baa-hayaa se huaa lagaa di aag si jangal mein naa-bakaaron ke ye faaeda to miri aatishin-navaa se huaa dilon ko ishq ne bakhshi hayaat-e-gham-afzaa ajab nishaana khataa tir-e-be-khataa se huaa qalandaron ne ulaT di bisaat-e-mai-khaana na rind se huaa aur kuchh na paarsaa se huaa mukhaalifon ki bhi jo dushmani se ho na sakaa vo kaam ik mire dam-saaz-o-aashnaa se huaa na kuchh bhi kar sake ashaab-e-fil the to bahut jo kuchh huaa tire darvesh-e-be-navaa se huaa ghuTan to dil ki rahi qasr-e-marmarin mein bhi na raushni se huaa kuchh na kuchh havaa se huaa vo ek qatl kaa ilzaam sar pe thaa so rahaa qisaas se na huaa kuchh na khun-bahaa se huaa"

"jalva-e-nau-bahaar ne luuT liyaa luTaa diyaa gesu-e-mushk-baar ne luuT liyaa luTaa diyaa bazm mein kah ke haal-e-dil un ko kyaa hai muzmahil dida-e-ashk-baar ne luuT liyaa luTaa diyaa haae vo dil-farebiyaan husn-e-nazar-fareb ki jalva-e-husn-e-yaar ne luuT liyaa luTaa diyaa pursish-e-gham pe haath se daaman-e-zabt chhuT gayaa mehr-e-nigaah-e-yaar ne luuT liyaa luTaa diyaa un ki nazar ki kyaa khataa dil se huaa qusur-e-shauq apne hi raaz-daar ne luuT liyaa luTaa diyaa haae vo chashm-e-nargis-e-jaam-e-sharaab-e-aatishin gardish-e-chashm-e-yaar ne luuT liyaa luTaa diyaa aae bhi yaa na aae ab mujh ko gharaz bahaar se kaif-e-gham-e-bahaar ne luuT liyaa luTaa diyaa daavar-e-hashr ke huzur shikve zabaan pe ruk gae dida-e-sharmsaar ne luuT liyaa luTaa diyaa aah-e-jigar-khraash se nazm-e-jahaan badal diyaa 'khaalid'-e-dil-e-figaar ne luuT liyaa luTaa diyaa"

"vo ek shakhs ki jo saath saath phirtaa thaa nazar jo badli to phir vo nazar nahin aayaa phiraa kiye hain chahl saal dasht-e-vahshat mein kisi ko yaad tiraa rahguzar nahin aayaa bahut jataayaa kisi ne ki saath saath thaa vo hamein to yaad koi ham-safar nahin aayaa kahaa thaa shaam se pahle hi lauT aaegaa hamein khayaal rahaa raat bhar nahin aayaa thake hue the bahut baiTh jaate saae mein hamaari raah mein koi shajar nahin aayaa ye raah-e-koh-e-nidaa hai qadam na apne baDhaa vahaan se lauT ke koi bashar nahin aayaa bahut hudud-e-zamaan-o-makaan se duur gae hamein to raas kabhi bhi safar nahin aayaa nahin ki yaad pataa us ko mere ghar kaa na thaa tamaam shahr mein ghumaa idhar nahin aayaa misaal-e-saaya thaa vo phir bhi duur duur rahaa hazaar saal hue lauT kar nahin aayaa rahaa raqib se hujjat mein 'qaadri' masruf magar vo le ke tumhaari khabar nahin aayaa"

"is ishq-e-junun-khez mein kyaa kyaa nahin hotaa divaana hai jo qais se lailaa nahin hotaa kuchh hashr lahad par abhi barpaa nahin hotaa aae ho to Thahro koi zinda nahin hotaa kyuun kar ye kahun husn kaa nashsha nahin hotaa hotaa to bahut hai magar itnaa nahin hotaa kuchh kahiye to sharmaa ke jhukaa lete hain gardan bhule se bhi ab vaada-e-fardaa nahin hotaa milte hain vo dil surkh hui jaati hai chuTki naazuk hain bahut khun-e-tamannaa nahin hotaa deti hai mazaa mai kaa hamein talkhi-e-tauba jab haath mein paimaana-e-sahbaa nahin hotaa vo hashr ke din kushte ko Thukraa chuke sau-baar kuchh jaan si paD jaati hai zinda nahin hotaa boli ye tamannaa jo ruke vo dar-e-dil par ghar aap kaa hai aap se pardaa nahin hotaa tiron ko jagah dete hain jo siine mein apne un logon ke ai jaan kaleja nahin hotaa sahraa se qadam ghar ki taraf khaak uThaaun kaanTe se judaa paanv kaa chhaalaa nahin hotaa baiThe nazar aate hain vahi teri gali mein jin kaa kahin duniyaa mein Thikaanaa nahin hotaa furqat mein hai kyuun nazaa ki taklif gavaaraa mar jaaein 'riyaaz' aap se itnaa nahin hotaa"

"muzhda ai zauq-e-asiri ki nazar aataa hai daam-e-khaali qafas-e-murgh-e-giraftaar ke paas jigar-e-tishna-e-aazaar tasalli na huaa ju-e-khun ham ne bahaai bun-e-har khaar ke paas mund gaiin kholte hi kholte aankhein hai hai khuub vaqt aae tum is 'aashiq-e-bimaar ke paas main bhi ruk ruk ke na martaa jo zabaan ke badle dashna ik tez saa hotaa mire gham-khvaar ke paas dahan-e-sher mein jaa baiThe lekin ai dil na khaDe ho jiye khubaan-e-dil-aazaar ke paas dekh kar tujh ko chaman bas-ki numu kartaa hai khud-ba-khud pahunche hai gul gosha-e-dastaar ke paas mar gayaa phoD ke sar 'ghaalib'-e-vahshi hai hai baiThnaa us kaa vo aa kar tiri divaar ke paas kab faqiron ko rasaai bu-e-mai-khvaar ke paas to bane bu dijiye maikhaane ki divaar ke paas"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"