Ghazal

jangalon kaa na hi baaghaat kaa paalaa huaa hai

ye kabutar to mire haath kaa paalaa huaa hai

amn kaa ye jo parinda hai amaan mein meri

ye miri niyyat-e-isbaat kaa paalaa huaa hai

· · ·

main tire lutf-o-karam kaa jab se ras piine lagaa

bas tabhi se khul ke apni zindagi jiine lagaa

ai bulandi chaahne vaale bhaTak mat aa udhar

mere shaanon ke sahaare arsh tak ziine lagaa

· · ·

hai ghazal se tujh ko shaghaf agar sabhi masalon ko sukhan banaa

gham-e-rozgaar ki baat kar tu aziyyaton ko sukhan banaa

kabhi mah-rukhon mein ulajh gayaa kabhi khushbuon ke hisaar mein

mire shauq-e-taba ne raae di tu na gesuon ko sukhan banaa

· · ·

ham us se ishq kaa izhaar kar ke dekhte hain

kiyaa hai jurm to iqraar kar ke dekhte hain

hai ishq jang to phir jiit lein chalo ham log

hai dariyaa aag kaa to paar kar ke dekhte hain

· · ·

duniyaa ki har sharaab se behtar tiri sharaab

piite hain tere yaar baraabar tiri sharaab

is mai-kade ke kyaa kahin zaahid bhi rind hain

kis shaan se vo piite hain khul kar tiri sharaab

· · ·

har taraf be-hisaab khaamoshi

lag rahi hai azaab khaamoshi

jis ki aadat thi bolte rahnaa

us pe kyon hai janaab khaamoshi

· · ·

sher-goi mein sadaa meyaar-e-fan rakkhaa karo

aur samundar fikr kaa bhi maujzan rakkhaa karo

vahshatein tanhaaiyon ki tum ko ghere hon agar

khud hi apni zaat mein ik anjuman rakkhaa karo

· · ·

kaise samjhegaa sadaf kaa vo guhar se rishta

jo samajh paae na aankhon kaa nazar se rishta

mo'atabar sar hi banaa lo to bahut achchhaa hai

kam hi rah paataa hai dastaar kaa sar se rishta

· · ·

nazm khabron ko kiyaa aur na latife likkhe

main ne ashaar mein jiine ke saliqe likkhe

martabe ahl-e-sukhan ke tumhein tai karne hain

kis ne haq baat kahi kis ne qaside likkhe

· · ·

zindagi se paas lekin husn ke qisse se duur

ham ghazal rakhte hain apni zulf ke saae se duur

ham se jin ko unsiyat hai vo khinche aa jaaeinge

un ko kyaa nazdik laaein jo hain khud pahle se duur

· · ·