Ghazal

"ahl-e-havas ke haathon na ye kaarobaar ho aabaad hon sitaare zamin regzaar ho ik shaan ye bhi jiine ki hai ji rahe hain log tufaan se lagaao samundar se pyaar ho haalaat mein kabhi ye tavaazun dikhaai de gham mustaqil rahe na khushi mustaaar ho nafrat ke sang-rezon ki baarish thame kabhi dair-o-haram ke beach safar khush-gavaar ho sadiyon se ghul rahi hai isi fikr mein hayaat rahzan se paak ziist ki har rahguzaar ho baad-e-sumum luuT le chehron ki taazgi agli sadi ki aisi na fasl-e-bahaar ho 'najmi' jo apne ahd ki taarikh ban gae un shaairon mein kaash miraa bhi shumaar ho"

"har zakhm-e-dil se anjuman-aaraai maang lo phir shahr-e-pur-hujum se tanhaai maang lo mausam kaa zulm sahte hain kis khaamushi ke saath tum pattharon se tarz-e-shakebaai maang lo husn-e-taalluqaat ki jo yaadgaar the maazi se aise lamhon ki raanaai maang lo maango samundaron se na saahil ki bhiik tum haan fikr-o-fan ke vaaste gahraai maang lo samjho unhein jo dete hain ye mashvara tumhein nargis se haath joD ke binaai maang lo vo so ke jyuun hi uTThein pahunch jaao un ke paas aur un se inqalaab ki angDaai maang lo 'najmi' sunaa hai tum pe bhi mausam hai mehrbaan baad-e-sumum se kabhi purvaai maang lo"

"koi ghamgin koi khush ho kar sadaa detaa rahaa raat shahr-e-dil kaa har manzar sadaa detaa rahaa sangsaari ki sazaa Thahri thi jin ke vaaste un ko pahle hi se har patthar sadaa detaa rahaa mere karb-e-tishnagi par raat shishe ro paDe khushk honTon ko mire saaghar sadaa detaa rahaa nashsha-e-sahraa-navardi mein tujhe kab hosh thaa tujh ko shahr-e-gul kaa ik ik ghar sadaa detaa rahaa kho gai jab aankh 'najmi' yaad aayaa khvaab mein ham ko shaayad ik pari-paikar sadaa detaa rahaa"

"log subh o shaam ki nairangiyaan dekhaa kiye aur ham chup-chaap maazi ke nishaan dekhaa kiye aql to karti rahi daamaan-e-hasti chaak chaak ham magar dast-e-junun mein dhajjiyaan dekhaa kiye khanjaron ki thi numaaish har gali har moD par aur ham kamre mein tasvir-e-butaan dekhaa kiye ham tan-aasaani ke khugar DhunDte manzil kahaan duur hi se gard-e-raah-e-kaarvaan dekhaa kiye ham ko is ki kyaa khabar gulshan kaa gulshan jal gayaa ham to apnaa sirf apnaa aashiyaan dekhaa kiye mausam-e-parvaaz ne 'najmi' pukaaraa thaa magar par sameTe ham qafas ki tiliyaan dekhaa kiye"

"aainon se pahle bhi rasm-e-khud-numaai thi dil shikaar hote the aisi dilrubaai thi phuul phuul baam-o-dar raaste hain gul-paikar vo udhar se guzre the yaa bahaar aai thi paas kaa musaafir kyuun uTh ke duur jaa baiThaa naam puchh lene mein aisi kyaa buraai thi kuchh shafaq shafaq aariz kuchh ufuq ufuq chehre aarzu ne bazm apni raat yuun sajaai thi kitnaa mohtaram thaa main bhultaa nahin 'najmi' bhuuk bhi mire ghar mein sar jhukaa ke aai thi"

"ishq ko paas-e-vafaa aaj bhi karte dekhaa ek patthar ke liye ji se guzarte dekhaa past ghaaron ke andheron mein jo le jaati hain vo uDaanein bhi to insaan ko bharte dekhaa jabhi laai hai sabaa mausam-e-gul ki aahaT barg afsurda hue shaakhon ko Darte dekhaa tiri dahliz pe gardish kaa guzar kyaa maani tujh ko jab dekhaa hai kuchh bante sanvarte dekhaa be-sadaa hi sahi par sang-e-sifat hain lamhe un ki aaghosh mein har shai ko bikharte dekhaa jo bhi biiti sar-e-farhaad pe biiti 'najmi' kisi 'parvez' ko teshe se na marte dekhaa"

"aaine se na Daro apnaa saraapaa dekho vaqt bhi ek musavvir hai tamaashaa dekho kar lo baavar koi laayaa hai ajaaib-ghar se jab kisi jism pe hanstaa huaa chehraa dekho chaahiye paani to lafzon ko nichoDo varna khushk ho jaaegaa afkaar kaa paudaa dekho shahr ki bhiiD mein shaamil hai akelaa-pan bhi aaj har zehn hai tanhaai kaa maaraa dekho vo jo ik hasrat-e-be-naam kaa saudaai hai us ko patthar ne baDi duur se taakaa dekho had se baDhne ki sazaa deti hai fitrat sab ko shaam ko kitnaa baDhaa kartaa hai saayaa dekho ab to sar phoD ke marnaa bhi hai mushkil 'najmi' haae is daur mein patthar bhi hai mahngaa dekho"

"biite hue lamhon ke jo girvida rahe hain haalaat ke haathon vahi ranjida rahe hain in jalvon se maamur hai duniyaa mire dil ki aainon ki basti mein jo naadida rahe hain rindadan-e-balaa-nosh kaa aalam hai niraalaa saaqi ki inaayat pe bhi nam-dida rahe hain barson gham-e-haalaat ki dahliz pe kuchh log gul kar ke diye zehnon ke khvaabida rahe hain har daur mein insaan ne jiiti hai ye baazi har daur mein kuchh masale pechida rahe hain insaan ki surat mein kai rang ke patthar ham siine pe rakkhe hue khvaabida rahe hain mujrim ki safon mein hain vo mazlum bhi jin se 'najmi' ne jo kuchh puchhaa to sanjida rahe hain"