Ghazal

"pas-e-tauba hadis-e-mutrib-o-paimaana kahte hain ye ik bhulaa huaa par aaj ham afsaana kahte hain koi khun-e-tamannaa ho jhalak aataa hai aaankhon mein isi ko ittihaad-e-baada-o-paimaana kahte hain tabaahi dil ki dekhi hai jo ham ne apni aaankhon se ho ab kaisi hi basti ham use viraana kahte hain fanaa hone mein soz-e-shama ki minnat-kashi kaisi jale jo aag mein apni use parvaana kahte hain jafaa par sabr sikhaa hai vafaa par jaan jaati hai yahi hai aur kis ko tohmat-e-mardaana kahte hain tumhaari zulf-e-pechaan mein rahaa kyun-kar dil-e-vahshi tuDaa le jaae jo zanjir use divaana kahte hain maaaz-allaah teraa husn teri bazm-e-ishrat mein ye vo mahfil hai jis mein shama ko parvaana kahte hain yahaan to jaan tak de di 'nazar' paadaash-e-ulfat mein magar bedaad-gar baaqi abhi jurmaana kahte hain"

"us ne mai pi ke sar-e-bazm jo saaghar ulTaa varaq-e-anjuman-e-dahr saraasar ulTaa dekhne vaale ko duniyaa hai saraapaa tasvir go hai aaine mein aks rukh-e-dilbar ulTaa kar diyaa aa ke chaman ko tah-o-baalaa kis ne koi sidhaa hai yahaan koi gul-e-tar ulTaa naaz se mujh ko sar-e-bazm jo saaqi ne diyaa haath tharraae kuchh is tarah ki saaghar ulTaa ai khudaa kyaa yuun hi aati hai kisi dost ki yaad aa gayaa munh ko kaleja dil-e-muztar ulTaa daad-khvaahaan-e-mohabbat kaa ye amboh-e-kasir dil miraa dekh ke hangaama-e-mahshar ulTaa jis pe ki baiTh ke vaaiz ne mazammat mai ki majlis-e-vaaz mein rindon ne vo mimbar ulTaa yaa zamaane mein mohabbat ke fasaane hain ghalat yaa miraa naqsh-e-vafaa hai mire dil par ulTaa taa-kujaa ai dil-e-bimaar ye raahat-talabi umr bhar jab se bichhaa phir na ye bistar ulTaa uTh gai aaj zamaane se bisaat-e-ulfat bistar-e-marg miraa us ne ye kah kar ulTaa ashk-baari-e-shab-e-hijr kaa kyaa haal likhun dida-e-tar ne 'nazar' ek samundar ulTaa"

"subh ko hashr bhi hai kaT gai gar aaj ki raat de rahaa hai miraa dil kal ki khabar aaj ki raat mere naalon mein ghazab kaa hai asar aaj ki raat log thaame hue baiThe hain jigar aaj ki raat zabt maane hai ki vo shokh shikaayat na kare be-sadaa aah bhi hai misl-e-asar aaj ki raat TuuTe paDte hain falak se bhi sitaare paiham chunne baiThaa hai jo afshaan vo qamar aaj ki raat zabt-e-naala ne ye andher kiyaa siine mein ban gayaa ghuT ke dhuaan soz-e-jigar aaj ki raat"

"rahaa karte hain mai-khaanon mein ham pir-e-mughaan ho kar tabiat zinda-dil rakhti hai piiri mein javaan ho kar chhupe the qabr mein gardish-zada kyaa shaadmaan ho kar yahaan bhi saath hai dauraan-e-sarkaa aasmaan ho kar huaa hai shohra daaghon kaa nisaar-e-gul-rukhaan ho kar uDi bu-e-vafaa meri nasim-e-bostaan ho kar jhukegi rafta rafta shaakh-e-nakhl-e-qad kamaan ho kar khinchegaa tuul furqat kaa zah-e-tir-e-fughaan ho kar mushaabah kar diyaa kyuun zoaf ne un ki nazaakat se mujhe khud apne uupar rashk aayaa naa-tavaan ho kar gai raunaq bhi chehre ki havaas-o-aql jaate hain uDaa sab rang-e-rukh vahshat mein gard-e-kaarvaan ho kar zamin par sozish-e-gham se giregaa aasmaan jal kar sharaar-e-dil chalaa sar halqa-e-daur-e-fughaan ho kar tasadduq un pe hotaa huun jo shoale dil se uThte hain basar kartaa huun main parvaana-e-sham-e-fughaan ho kar fanaa ho kar kahin miTti hai yaarab shorish-e-vahshat fughaan kartaa huun main zanjir-e-baab-e-laa-makaan ho kar khudaa samjhe hamaari aah-e-sozaan se judaai mein ki saari dil ki taaqat uD gai munh se dhuaan ho kar dil-e-naalaan ne ham-saayon ko bhi dushman kiyaa apnaa rahaa karte hain ham battis daanton mein zabaan ho kar hamesha se 'nazar' ham mahv-e-yaad-e-ru-e-raushan hain chamak is dard ki rassi se ham dil mein nur-e-jaan ho kar"

"tire vaade kaa har ik ko agar e'tibaar hotaa to jahaan mein kuchh na hotaa faqat intizaar hotaa abhi kam hai soz-e-ulfat ki nafas sharar-fishaan hai agar aag tez hoti to ye shoala-baar hotaa dil-o-tir-e-khun-chakaa ki vo shabih khinch detaa jo lahu kaa koi qatra sar-e-nok-e-khaar hotaa mujhe dard bhi thaa raahat mujhe gham bhi thaa masarrat jo vo mujh ko ranj de kar kabhi gham-gusaar hotaa jo bharaa hai gham se siina to sukut hi hai behtar ki labon par aah aati to ik ishtihaar hotaa kabhi yuun miTaa na saktaa use aasmaan-e-zaalim tire dar pe o sitamgar jo miraa mazaar hotaa ye hijaab-e-jism-e-khaaki ki hai diid kaa munaafi kabhi darmiyaan se uThtaa to visaal-e-yaar hotaa na huaa asar kisi par mire naala-e-hazin kaa tiraa tiir thaa na zaalim ki jigar ke paar hotaa abhi aur tuul dete gham-e-ishq ko 'nazar' ham agar apni zindagi kaa hamein e'tibaar hotaa"

"hijr mein naashaad duniyaa se dil-e-muztar gayaa aaj apne saath kaa ik marne vaalaa mar gayaa sunne vaale khuub roe mere haal-e-zaar par yuun hi apni umr kaa paimaana aakhir bhar gayaa baazu-e-qaatil thakaae sakht-jaani ne miri baarhaa is haath se us haath mein khanjar gayaa ham vahi gulshan vahi mahfil vahi saamaan vahi ek saaqi kyaa gayaa lutf-e-mai-o-saaghar gayaa ho gai ghairon ko bhi naakaam marne ki havas main kisi par jaan de kar kaam apnaa kar gayaa ruh-parvar hai nigaah-e-naaz qaatil kaa asar jis ko dekhaa ji uThaa jis ko na dekhaa mar gayaa main kabhi royaa to vo bole Duboyaa naam-e-ishq aur agar aansu pi liye to dil mein dariyaa bhar gayaa aisi hi ghaflat rahi gar mere haal-e-zaar par ek din ahbaab sun leinge 'nazar' bhi mar gayaa"

"baad muddat jo main ai charkh-e-kuhan yaad aayaa kyaa sitam koi nayaa mushfiq-e-man yaad aayaa sher kahtaa thaa ki mazmun-e-dahan yaad aayaa ik muamma ye dam-e-fikr-e-sukhan yaad aayaa ahl-e-duniyaa ko kisi din na hui fikr-e-adam kyaa musaafir hain ki jin ko na vatan yaad aayaa dekh kar abr-e-bahaari miri nisbat badli sehn-e-gulshan mein dil-e-tauba-shikan yaad aayaa rishta-e-jaan mein girah paD gai uljhan ke sabab dil ko jab gesu-e-pur-pech-o-shikan yaad aayaa paa ke sar-chashma-e-haivaan jo phir aayaa ulTaa kyaa 'sikandar' ko tiraa chaah-e-zaqan yaad aayaa miT gai dil ke na hone se vo daaghon ki bahaar ai 'nazar' vaqt-e-khizaan ham ko chaman yaad aayaa"

"vo taghaaful ko ilaaj-e-gham-e-pinhaan samjhaa chaara-gar bhi na mire dard kaa darmaan samjhaa taab-e-didaar na laai nigah-e-naaz-parast aur vo dida-e-ushshaaq pe ehsaan samjhaa jama khaatir na hui did-e-butaan se apni daftar-e-husn ko ajzaa-e-pareshaan samjhaa na hui jalva-gah-e-naaz ki vusat maalum go main har zarra ko ik dida-e-hairaan samjhaa thi tiri yaad bhi kyaa anjuman-aaraa-e-khayaal dil mein jo shoala uThaa sham-e-shabistaan samjhaa shorish-e-ishq kaa aasaan na thaa andaaza chaak ho kar miri vahshat ko garebaan samjhaa saahib-e-dil hai vahi murshid-e-kaamil hai vahi mere chehre se jo meraa gham-e-pinhaan samjhaa har nafas shaahid-e-dushvaari-e-ulfat hai 'nazar' sakht mushkil thaa vahi kaam jo aasaan samjhaa"

"kyuun kahte ho kyaa meri jafaa ko nahin dekhaa aate hue kah kah ke qazaa ko nahin dekhaa aaina-e-kaunain hain donon miri aankhein tum ko nahin dekhaa ki khudaa ko nahin dekhaa dekhe to koi tez-ravi umr-e-ravaan ki phir kar kabhi naqsh-e-kaf-e-paa ko nahin dekhaa har khaar se yuun puchhti hai dasht mein lailaa tum ne to kisi aabla-paa ko nahin dekhaa kis ghash pe tumhein naaz hai ai hazrat-e-musaa un ki nigah-e-hosh-rubaa ko nahin dekhaa aaina-e-vahdat hai dil-e-saaf hamaaraa kis but mein nazar shaan-e-khudaa ko nahin dekhaa"

"koi armaan talaash-e-dost kaa kyuun dil mein rah jaataa ghubaar apnaa agar gard-e-rah-e-manzil mein rah jaataa nahin maa'lum kis muddat se khanjar tishna-e-khun thaa koi khatra lahu kaa kyuun tan-e-bismil mein rah jaataa safaai kab thi mumkin ye ghubaar-e-dil vo kaafir hai mire dil se nikaltaa bhi to us ke dil mein rah jaataa jalaa aur jal ke soz-e-rashk se dil bujh gayaa fauran agar hotaa charaagh-o-shama us mahfil mein rah jaataa taassuf hai ghubaar-e-qais ki parvaaz-e-hasrat par lipaT kar kaash thoDaa parda-e-mahmil mein rah jaataa na detaa gar sahaaraa kuchh umid-e-vasl kaa tufaan shanaavar bahr-e-gham kaa hasrat-e-saahil mein rah jaataa is aaine mein gar vo dekh lete ru-e-anvar ko to kyuun itnaa baDaa dhabba mah-e-kaamil mein rah jaataa na miltaa muddaaa-e-dil diram miltaa jo mun'im se magar ik daagh ban kar vo kaf-e-saail mein rah jaataa nishaan us kaa kahin miltaa suraagh us kaa kahin lagtaa to apnaa paanv kyuun thak kar rah-e-manzil mein rah jaataa 'nazar' ham ko 'ilaaqa sher se kyaa par ye hasrat hai na rahte ham to apnaa zikr us mahfil mein rah jaataa"

"kasrat se daagh hain jo gham-e-ishq-e-khaal mein til bhar jagah nahin hai dil-e-pur-malaal mein ifshaa-e-raaz-e-ishq jo ashkon ne kar diyaa Duubaa huaa hai dil araq-e-infiaal mein rahti nahin hai zulf-e-pareshaan banaav se bikhri hai is liye ki phanse koi jaal mein ai jaan dil ke gor-e-gharibaan mein aaiye sab aarzuein dafn hain gard-e-malaal mein dil ko jo yaad-e-jalva-e-aariz hai dam-ba-dam raushan hai sham-e-husn makaan-e-khayaal mein kyaa dil dukhaaoge jo maza dard kaa nahin dam bhar to baiTho aa ke dil-e-pur-malaal mein ham ko hujum-e-gham bhi ghanimat huaa 'nazar' sab aib dil ke chhup gae gard-e-malaal mein"

"haath rakhte hi thaa haal-e-qalb-e-muztar aaina dast-e-naazuk hai hasinon kaa muqarrar aaina ban gayaa ghammaaz shakl un ki dikhaa kar aaina jo hamaaraa raaz-e-dil thaa ab hai un par aaina toD kar dil tum ne khoyaa imtiyaaz-e-husn bhi ik tumhaare paas thaa yaa ab hai ghar ghar aaina dekhnaa hai kis mein achchhi shakl aati hai nazar us ne rakkhaa hai mire dil ke baraabar aaina aaina rakkho lo ki duunaa lutf aae vaqt-e-ranj is taraf tum us taraf khinche ho khanjar aaina 'aks se apne kisi ke garm-joshi qahr thi rah gayaa aakhir pasine mein nahaa kar aaina shauq-e-khud-bini sitam nindein javaani ki ghazab be-khabar sote hain vo rakkhaa hai munh par aaina shokhiyon se ban gayaa bijli kisi kaa 'aks bhi ab to haathon se nikaltaa hai taDap kar aaina yuun kahaan mumkin thaa husn-e-khaas kaa didaar-e-aam ban gai aakhir saraapaa subh-e-mahshar aaina dekh lein shaayad 'nazar' vo dida-e-insaaf se le chalo TuuTe hue dil kaa banaa kar aaina"

"intizaar-e-hashr kar sakte nahin naakaam-e-ishq aaj hi ho jaae honaa ho jo kal anjaam-e-ishq ibtidaa mein dard-e-furqat maut hai anjaam-e-ishq ahl-e-dil ko naa-muvaafiq hai havaa-e-baam-e-ishq be-khudi mein DabDabaa aae hain aansu aankh mein al-madad ai zabt chhalkaa chaahtaa hai jaam-e-ishq us ki ulfat ne kiyaa rusvaa-e-aalam kis qadar ungliyaan uThti hain jaate hain jidhar badnaam-e-ishq kyon nasihat mein tiri naaseh hain ye dil-soziyaan kyaa tire dil par guzarte hain mire aalaam-e-ishq chashm-e-giryaan qalb-e-naalaan ki shamaatat qahr hai donon mil kar ik mujhi ko dete hain ilzaam-e-ishq hasratein bhi aaj dil ke saath hi dam toD dein aage pichhe saath vaalon kaa na ho anjaam-e-ishq baam par aa kar zaraa bikhraaiye zulf-e-daraaz phail jaae saare aalam mein savaad-e-shaam-e-ishq aur kyaa eajaaz hotaa husn-e-lailaa ke liye mar gayaa majnun magar zinda hai ab tak naam-e-ishq chaar hi din mein 'nazar' tum is qadar ghabraa gae aasmaan se koi puchhe gardish-e-ayyaam-e-ishq"

"kuchh khushi se hamin ishq-e-sitam-ijaad nahin apne kahne hi mein apnaa dil-e-naashaad nahin tujh saa be-rahm koi aur sitam-ijaad nahin dam bhi lene ki ijaazat dam-e-be-daad nahin ye nayaa zulm hai yaarab ki unhin kaa vaada ham unhein yaad dilaaein vo kahein yaad nahin siikh jaataa hai bashar ishq ke sadme sah kar choT dil ki bhi kam az saili-e-ustaad nahin jaan hi jaaegi yaa sabr hi aa jaaegaa yaa hamein aaj nahin yaa dil-e-naashaad nahin yahi mahshar hai yahi vaada-e-fardaa kaa hai din aap kyaa bhuul gae aur mujhe yaad nahin yuun huaa huun main 'nazar' ishq-e-butaan mein kaafir main to main mere farishton ko khudaa yaad nahin"

"shauq-e-dil fikr-e-dahan mein hai jo rahbar ki tarah DhunDhtaa huun chashma-e-haivaan sikandar ki tarah meri aahon ko abas hai naa-rasaai kaa gila dil mein ghar karnaa to sikhein yaad-e-dilbar ki tarah sar se paa tak hai misaal-e-gardan-e-taslim kham kis se hotaa hai adab qaatil kaa khanjar ki tarah thaa jo vaqt-e-qatl armaan-e-ham-aaghoshi mujhe khuun ki chhinTein lipTi hain khanjar se jauhar ki tarah dard-e-dil uTh uTh ke Dhaataa hai qayaamat jaan par shaam-e-hijr-e-aashiqaan hai subh-e-mahshar ki tarah dil ko aankhon ne sujhaai hain jo raahein ishq ki har jagah mujh ko liye phirtaa hai rahbar ki tarah yaad-e-gesu ik balaa-e-jaan-sitaan hai hijr mein kaaTe khaataa hai miraa ghar mujh ko azhdar ki tarah is ko lutf-e-dard us ko lazzat-e-mashq-e-jafaa dil ki aadat bigDi hai khu-e-sitamgar ki tarah un ki aamad ki khabar sun kar hujum-e-shauq se kashmakash hai khaana-e-dil mein bhare ghar ki tarah misl-e-divaana phiraa kartaa hai kyon ye roz-o-shab aasmaan ko bhi hai kyaa saudaa mire sar ki tarah aap ki ghaflat se saari aarzuein mar gaiin dil miraa viraan hai ujDe hue ghar ki tarah ban ke shabnam laakh Tapkein chashm-e-akhtar se sarishk roegaa kyaa aasmaan us dida-e-tar ki tarah TukDe TukDe dil jigar hain tez fiqron se huzur aap ki tegh-e-zabaan chalti hai khanjar ki tarah raah mein dil nichi nazron se huaa jaataa hai zabh jhuk ke bhi chaltaa hai vo qaatil to khanjar ki tarah shukr-e-khaaliq hai ki be-minnat main hotaa huun shahid dil ko yaad-e-abru-e-qaatil hai khanjar ki tarah tauba tauba kyaa ghazab saaqi ki ghaflat ne kiyaa sab ki surat dekhtaa huun rind-e-be-zar ki tarah hijr-e-saaqi mein nazar aayaa kahin gar shaghl-e-mai DabDabaae dida-e-tar chashm-e-saaghar ki tarah aarzu-e-vasl-e-qaatil itni hai mujh zaar ko huun hama-tan surat-e-aaghosh khanjar ki tarah ai 'nazar' ishq-e-miyaan-e-yaar kaa hai ye asar jism-e-laaghar jo nihaan hai jaan ke jauhar ki tarah"

"kaarobaar-e-ishq ki kasrat kabhi aisi na thi dil na thaa to tangi-e-fursat kabhi aisi na thi yaas se viraani-e-hasrat kabhi aisi na thi dil mein sannaaTaa na thaa vahshat kabhi aisi na thi un ke vaade par hamein jiinaa paDaa hai hashr tak varna tulaani shab-e-furqat kabhi aisi na thi dekh Daale zindagi mein vasl-o-furqat ke tilism gham kabhi aisaa na thaa raahat kabhi aisi na thi aap ne bimaar-pursi ki to jiinaa hai vabaal varna marne ki mujhe hasrat kabhi aisi na thi baa-mazaa hai kis qadar inkaar un kaa vasl mein tujh mein ai khun-e-jigar lazzat kabhi aisi na thi dil ko kyaa samjhaa diyaa naumidi-e-jaaved ne parda-daar-e-gham shab-e-furqat kabhi aisi na thi zindagi ki kashmakash se mar ke paai kuchh najaat is se pahle ai 'nazar' fursat kabhi aisi na thi"

"jo muddaton mein kisi shokh kaa shabaab aayaa rahin-e-daaman-o-minnat-kash-e-hijaab aayaa numud-e-shaam hui vaqt-e-iztiraab aayaa jahaan-e-ishq-o-mohabbat mein inqalaab aayaa junun mein ziist thi apni tilism-e-bedaari qazaa ne aa ke sulaayaa to ham ko khvaab aayaa na dil mein dard hi baaqi hai ab na aankh mein ashk akhir vaqt hai paayaan-e-iztiraab aayaa bas ab tamaam huaa intizaar qaasid kaa ki zindagi ki taraf se hamein javaab aayaa ghazab thi bazm mein saaqi ki tarz-e-mastaana bharaa huaa na koi saaghar-e-sharaab aayaa nizaam-e-aalam-e-furqat khilaaf-e-qudrat thaa na maahtaab hi niklaa na aaftaab aayaa 'nazar' iqaamat-e-duniyaa ki khatm muddat hai ki ham bhi piir hue vaqt-e-paa-turaab aayaa"

"mujassam daagh-e-hasrat huun saraapaa naqsh-e-ibrat kaa mujhe dekho ki hotaa hai yahi anjaam ulfat kaa unhein shauq-e-dil-aazaari hamein zauq-e-vafaadaari khudaa-haafiz hai ab apne kishor-e-kaar-e-ulfat kaa visaal-e-yaar ki ai dil koi pur-zor koshish kar havaa-e-aah se parda uThaa de shaam-e-furqat kaa dil-e-pur-shauq ne Daalaa hai mujh ko kis kashaakash mein idhar hai had ki be-sabri udhar vaa'da qayaamat kaa tum aise be-khabar bhi shaaz honge is zamaane mein ki dil mein rah ke andaaza nahin hai dil ki haalat kaa jahaan mein chaar din rah kar faqat bu-e-vafaa denaa gulon se main sabaq letaa huun aain-e-sohbat kaa lagaa rakhtaa hai us ki nazr ko chashm-e-tamannaa ne vo ik aansu ki majmu'a hai saari dil ki taaqat kaa miri qudrat se ab ikhfaa-e-raaz-e-ishq baahar hai ki rang aane lagaa hai aansuon mein khun-e-hasrat kaa ik aah-e-sard bhar letaa huun jab tum yaad aate ho khulaasa kis qadar main ne kiyaa hai ranj-e-furqat kaa vo dil hai bazm-e-aalam mein 'nazar' ik saaz-e-bashkasta na chheDe taar-e-hasti par jo naghma us ki qudrat kaa"

"khinch kar yuun le chali vahshat bayaabaan ki taraf laaein jaise tifl-e-bad-khu ko dabistaan ki taraf faiz vahshat kaa adaa-e-shukr jab vaajib huaa sar jhukaayaa ham ne mehraab-e-garebaan ki taraf haasil-e-josh-e-junun hai maatam-e-hosh-o-khirad khaak uDaate jaate hain vahshi bayaabaan ki taraf aql ke tegh-e-junun-e-tez se kuche kaTe kaun aae jaada-e-chaak-e-garebaan ki taraf kar chukaa josh-e-junun jins-e-khirad par haath saaf lauT ab aati hai baazaar-e-garebaan ki taraf ishq ke maktab mein jab aayaa paye dars-e-junun pahle hi ungli uThi nun-e-garebaan ki taraf maail-e-zevar huaa jab vo hasin-e-jaama-zeb chaand aayaa charkh se tauq-e-garebaan ki taraf hosh mein aate hain divaane gai fasl-e-bahaar dasht-e-vahshat chhup rahe pusht-e-garebaan ki taraf naakhun-e-gham kaa nishaan dil par hai misl-e-maah-e-nau ungliyaan uThti hain us zakhm-e-numaayaan ki taraf jab kisi aashiq ne kuchh haal-e-pareshaani kahaa hans diye munh pher kar zulf-e-pareshaan ki taraf zoaf mein ji khol kar rone ki hasrat hai mujhe dekhtaa hai yaas se har ashk daamaan ki taraf shama ke shoale sitam karte hain misl-e-barq-e-tur dekhtaa huun jab 'nazar' bazm-e-hasinaan ki taraf"

"khugar-e-lazzat huun main kis shokh ki taazir kaa dil ko hasrat hai ki pahlu DhunDiye taqsir kaa thaa miraa hangaama-e-vahshat azal se peshtar arsh ki zanjir TukDaa hai miri zanjir kaa mar gayaa zindaan mein jab main vahshi-e-aatish-nafas bujh gayaa shoala charaagh-e-khaana-e-zanjir kaa sakht-jaani se dil-e-muztar jo taDpaa vaqt-e-qatl ban gayaa sang-e-fasaan qaatil tiri shamshir kaa ho ke bismil aarzu-e-guftagu qaatil se hai har dahaan-e-zakhm naqsha hai lab-e-taqrir kaa itni hai mashq-e-tasavvur intizaar-e-qatl mein mardumak hai aankh mein jauhar tiri shamshir kaa jaan kar ThanDi havaa vo chain se sote to hain dam bharun kyun-kar na aah-e-sard-e-be-taasir kaa hotaa hai insaan paidaa vaaste fariyaad ke ye ishaara hai sarir-e-khaama-e-tahrir kaa ruuh aa jaati hai tan mein tegh-e-uryaan dekh kar murgh-e-jaan bulbul hai baagh-e-jauhar-e-shamshir kaa aaj tak aavaaz aati hai dahaan-e-gor se hai ye madfan kushta-e-tegh-e-lab-e-taqrir kaa aur duunaa gham uThaayaa ki miTaane ki jo fikr daagh-e-hasrat ho gayaa likkhaa miri taqdir kaa rafta rafta yuun ghulaayaa qaid mein gham ne 'nazar' tauq-e-gardan paanv mein halqa banaa zanjir kaa"

"zabt se dil nazaar rahtaa hai andaruni bukhaar rahtaa hai yuun to dil ko kabhi qaraar na thaa ab bahut be-qaraar rahtaa hai qata ummid ho to sabr aae roz ik intizaar rahtaa hai maaya-e-zindagi sukhan hai 'nazar' sher hi yaadgaar rahtaa hai"

"un ki rukhsat ik qayaamat thi dam-e-izhaar-e-subh shaam tak bachtaa nazar aataa nahin bimaar-e-subh mujh ko bhi ai shama ro le vasl ki shab hai akhir aur do aansu bahaa ai kushta-e-aazaar-e-subh kho diyaa tul-e-shab-e-furqat ne lutf-e-intizaar dida-e-be-khvaab ko hai hasrat-e-didaar-e-subh vasl ki shab bujh gayaa thaa jo hamaaraa daagh-e-dil mehr ban kar ab vahi hai turra-e-dastaar-e-subh subh se pahle ulaT di us ne chehre se naqaab ab koi kaafir bhi kar saktaa nahin inkaar-e-subh raat bhar meri zabaan par sar-guzasht-e-shaam-e-gham un ke lab hain aashnaa-e-lazzat-e-guftaar-e-subh vasl ki be-lutfiyaan bhi lutf se khaali nahin raat bhar dil ko maza deti rahi takraar-e-subh iid milne aaein vo gar iid kaa niklaa hai chaand shaam aae saath le kar daulat-e-bedaar-e-subh vasl mein hai apni qismat ki khalish bhi yaadgaar daaman-e-shab se ulajh jaate hain aksar khaar-e-subh de subuhi jald saaqi ab nahin maah-e-siyaam be-sabab kyuun raah dekhein shaam ki mai-khvaar-e-subh dekhnaa kyaa jald guzri hai shab-e-vaada 'nazar' vo idhar aae udhar zaahir hue aasaar-e-subh"

"koi mujh saa mustahiqq-e-rahm-o-gham-khvaari nahin sau maraz hain aur ba-zaahir koi bimaari nahin har qadam par baagh-e-aalam mein bichhaa hai daam-e-husn kaun aisaa hai jise zauq-e-giraftaari nahin dekhe gar ghaur se duniyaa hai ghaflat kaa tilism ye bhi khvaab-e-ishq hai furqat se bedaari nahin jaan le kar bhi jo haath aae to arzaan jaaniye sahl aisi jins-e-ulfat ki kharidaari nahin 'ishq ki naakaamiyon ne is qadar khinchaa hai tuul mere gham-khvaaron ko ab yaaraa-e-gham-khvaari nahin mujh se zabt-e-dard-e-ulfat ki shikaayat hai fuzul ai dil-e-naadaan tujhe ehsaas-e-khud-daari nahin meri daulat dekh kar kyuun tum ne ThanDi saans li be-kason par rasm-e-aain-e-sitamgaari nahin har taraf se ye sadaa aati hai mulk-e-husn mein ye vo duniyaa hai jahaan rasm-e-vafaadaari nahin ho gayaa shaayad ki sarf-e-soz-e-gham sab khun-e-dil aansuon kaa ab vo dariyaa aankh se jaari nahin us ko rahm aae kahaan ye naa-umidi mein umiid dil ko khush karnaa hai shaghl-e-girya-o-zaari nahin ham hain chup baiThe hue lekin hai dil masruf-e-ishq is adim-ul-fursati kaa naam bekaari nahin band aankhon se nazar aati hai har shai dahr ki aalam-e-ruyaa mein farq-e-khvaab-o-bedaari nahin"

"saare aalam se mire gham kaa hai afsaana judaa dil ke maatam ke liye chaahiye gham-khaana judaa garche vahshat kaa nahin hai koi afsaana judaa par nazar aataa hai sab se tiraa divaana judaa qurbat-e-husn ghazab hai ki sar-e-mahfil-e-naaz us ke lab se nahin hotaa lab-e-paimaana judaa ai khudaa kashmakash-e-yaas-o-tamannaa kab talak un ke rahne ke liye dil mein ho har khaana judaa aaj tang aa ke ye naaseh ko diyaa main ne javaab mazhab-e-shaikh judaa mashrab-e-rindaana judaa khushk ho jaae jo baaqi hai rag-e-jaan mein lahu dil se honaa na abhi ai gham-e-jaanaana na judaa be-khudi mein bhi raqaabat kaa magar hai ehsaas ek sahraa mein hai divaane se divaana judaa sabr ki mujh ko judaai mein hai talqin fuzul ye to jab ho ki rahe shama se parvaana judaa dasht jaagir hai majnun ki to kyaa fikr 'nazar' khod kar ghar ko banaa lijiye viraana judaa"