vo kare baat to har lafz se khushbu aae — Ahmad Wasi

muddat ke baa'd aaina kal saamne paDaa
dekhi jo apni shakl to chehra utar gayaa

thak ke yuun pichhle pahar sau gayaa meraa ehsaas
raat bhar shahr mein aavaara phiraa ho jaise

judaai kyuun dilon ko aur bhi nazdik laati hai
bichhaD kar kyuun ziyaada pyaar kaa ehsaas hotaa hai

log hairat se mujhe dekh rahe hain aise
mere chehre pe koi naam likhaa ho jaise

jo kahtaa thaa zamin ko main sitaaron se sajaa dungaa
vahi basti ki tah mein rakh gayaa chingaariyaan apni

muddat guzar gai hai ki dil ko sukun nahin
muddat guzar gai hai kisi kaa bhalaa kiye

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

shor din ko nahin sone detaa
shab ko sannaaTaa jagaa detaa hai

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

suntaa huun un ki bazm mein chhalkeinge aaj jaam
main bhi chalaa huun dida-e-pur-nam liye hue

ham musaafir hain gard-e-safar hain magar ai shab-e-hijr ham koi bachche nahin
jo abhi aansuon mein nahaa kar gae aur abhi muskuraate palaT aaeinge