ek hi shahr mein rahnaa hai magar milnaa nahin — Aitbar Sajid

abhi rail ke safar mein hain bahut nihaal donon
kahin rog ban na jaae yahi saath do ghaDi kaa

kisi ko saal-e-nau ki kyaa mubaarakbaad di jaae
calender ke badalne se muqaddar kab badaltaa hai

ab to khud apni zarurat bhi nahin hai ham ko
vo bhi din the ki kabhi teri zarurat ham the

guftugu der se jaari hai natije ke baghair
ik nai baat nikal aati hai har baat ke saath

main takiye par sitaare bo rahaa huun
janam-din hai akelaa ro rahaa huun

phuul the rang the lamhon ki sabaahat ham the
aise zinda the ki jiine ki alaamat ham the