main takiye par sitaare bo rahaa huun — Aitbar Sajid

abhi rail ke safar mein hain bahut nihaal donon
kahin rog ban na jaae yahi saath do ghaDi kaa

kisi ko saal-e-nau ki kyaa mubaarakbaad di jaae
calender ke badalne se muqaddar kab badaltaa hai

ab to khud apni zarurat bhi nahin hai ham ko
vo bhi din the ki kabhi teri zarurat ham the

ek hi shahr mein rahnaa hai magar milnaa nahin
dekhte hain ye aziyyat bhi gavaara kar ke

guftugu der se jaari hai natije ke baghair
ik nai baat nikal aati hai har baat ke saath

phuul the rang the lamhon ki sabaahat ham the
aise zinda the ki jiine ki alaamat ham the

main bhi bikhraa huaa huun apnon mein
vo bhi tanhaa saa apne ghar mein hai

kyaa usi kaa naam hai raanaai-e-bazm-e-hayaat
tang kamra sard bistar aur tanhaa aadmi

ek din naqsh-e-qadam par mire ban jaaegi raah
aaj sahraa mein to tanhaa huun kahin koi nahin

maidaan mein akelaa nihatthaa khaDaa thaa main
dushman ko meri nekiyaan lashkar dikhaai diin

paDh chuke hain nisaab-e-tanhaai
ab likheinge kitaab-e-tanhaai

go sag-e-duniyaa huun par tanhaa-khuri mujh mein nahin
TukDaa TukDaa baanT khaayaa jo mayassar ho gayaa