phuul the rang the lamhon ki sabaahat ham the — Aitbar Sajid

kisi ko saal-e-nau ki kyaa mubaarakbaad di jaae
calender ke badalne se muqaddar kab badaltaa hai

ab to khud apni zarurat bhi nahin hai ham ko
vo bhi din the ki kabhi teri zarurat ham the

ek hi shahr mein rahnaa hai magar milnaa nahin
dekhte hain ye aziyyat bhi gavaara kar ke

guftugu der se jaari hai natije ke baghair
ik nai baat nikal aati hai har baat ke saath

main takiye par sitaare bo rahaa huun
janam-din hai akelaa ro rahaa huun

abhi rail ke safar mein hain bahut nihaal donon
kahin rog ban na jaae yahi saath do ghaDi kaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

kahaan milegi misaal meri sitamgari ki
ki main gulaabon ke zakhm kaanTon se si rahaa huun

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

sote mein vo jo mujh se ham-aaghosh ho gae
jitne gile the khvaab-e-faraamosh ho gae

nahin vo agli si raunaq dayaar-e-hasti ki
tabaah-kun koi tufaan thaa shabaab na thaa

mire junun pe tumhein eatibaar aae na aae
ye sar kaa zakhm khulegaa bahaar aae na aae