aise sulag uThaa tiri yaadon se dil miraa — Ajay Sahaab

ek muddat se dhadhaktaa rahaa meraa ye zehn
tab kahin jaa ke farozaan hue lafzon ke charaagh

fan jo meaar tak nahin pahunchaa
apne shahkaar tak nahin pahunchaa

kaash lauTein mire paapaa bhi khilaune le kar
kaash phir se mire haathon mein khazaana aae

haadse jaan to lete hain magar sach ye hai
haadse hi hamein jiinaa bhi sikhaa dete hain

har khudaa jannaton mein hai mahdud
koi sansaar tak nahin pahunchaa

jab bhi milte hain to jiine ki duaa dete hain
jaane kis baat ki vo ham ko sazaa dete hain

mere khvaabon ke jharokon ko sajaate rahiye
na sahi vasl magar yaad to aate rahiye

shaam paDe so jaane vaalaa! diip bujhaa kar yaadon ke
raat gae tak jaag rahaa thaa pahli pahli baarish mein

tumhaari yaad kaa marham banaam-e-dil kar duun
tamaam hijr ke zakhmon ko mundamil kar duun

aaj kuchh rang digar hai mire ghar kaa 'khaalid'
sochtaa huun ye tiri yaad hai yaa khud tu hai

ek jhonkaa tire pahlu kaa mahakti hui yaad
ek lamha tiri dildaari kaa kyaa kyaa na banaa

nazar mein yaadon ke manzar sameT kar rakhnaa
main jaisaa chhoD ke aai huun vaisaa ghar rakhnaa