dayaar-e-sajda mein taqlid kaa rivaaj bhi hai — Ali Jawad Zaidi

ye dushmani hai saaqi yaa dosti hai saaqi
auron ko jaam denaa mujh ko dikhaa dikhaa ke

— Ali Jawad Zaidi

guftugu ke khatm ho jaane par aayaa ye khayaal
jo zabaan tak aa nahin paayaa vahi to dil mein thaa

— Ali Jawad Zaidi

jin hauslon se meraa junun mutmain na thaa
vo hausle zamaane ke meyaar ho gae

— Ali Jawad Zaidi

lazzat-e-dard mili ishrat-e-ehsaas mili
kaun kahtaa hai ham us bazm se naakaam aae

— Ali Jawad Zaidi

ab dard mein vo kaifiyat-e-dard nahin hai
aayaa huun jo us bazm-e-gul-afshaan se guzar ke

— Ali Jawad Zaidi

jab kabhi dekhaa hai ai 'zaidi' nigaah-e-ghaur se
har haqiqat mein mile hain chand afsaane mujhe

— Ali Jawad Zaidi

jinhein ye fikr nahin sar rahe rahe na rahe
vo sach hi kahte hain jab bolne pe aate hain

— Aabid Adeeb

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

— Parveen Shakir

bagulaa jin ke sar par chatr-e-shaahi hai zamin masnad
vahi aqlim-e-gham mein aah ki naubat bajaate hain

— Siraj Aurangabadi

maango samundaron se na saahil ki bhiik tum
haan fikr o fan ke vaaste gahraai maang lo

— Hasan Najmi Sikandarpuri

us ko sochun to dhyaan mein mere
khushbu aati hai pahli baarish ki

— Vibha Jain 'Khwaab'

azaab-e-daanish-e-haazir se baa-khabar huun main
ki main is aag mein Daalaa gayaa huun misl-e-khalil

— Allama Iqbal