ye dushmani hai saaqi yaa dosti hai saaqi — Ali Jawad Zaidi

guftugu ke khatm ho jaane par aayaa ye khayaal
jo zabaan tak aa nahin paayaa vahi to dil mein thaa

jin hauslon se meraa junun mutmain na thaa
vo hausle zamaane ke meyaar ho gae

lazzat-e-dard mili ishrat-e-ehsaas mili
kaun kahtaa hai ham us bazm se naakaam aae

ab dard mein vo kaifiyat-e-dard nahin hai
aayaa huun jo us bazm-e-gul-afshaan se guzar ke

dil kaa lahu nigaah se Tapkaa hai baar-haa
ham raah-e-gham mein aisi bhi manzil se aae hain

jab kabhi dekhaa hai ai 'zaidi' nigaah-e-ghaur se
har haqiqat mein mile hain chand afsaane mujhe

jab ki pahlu se yaar uThtaa hai
dard be-ikhtiyaar uThtaa hai

ye kyaa bad-mazaaqi hai gard jhaaDte kyuun ho
is makaan-e-khasta mein yaar ham bhi rahte hain

kisi khayaal ki sarshaari mein jaari-o-saari yaari mein
apne-aap koi aaegaa aur ban jaaegaa mehmaan

baDe baa-vafaa the mire yaar sab
musibat mein jab tak pukaaraa na thaa

tum ko jiine ke bhi aate nahin atvaar magar
ham ko marne ke bhi me'yaar samajh aate hain

vahin ke pattharon se puchh meraa haal-e-zindagi
main reza reza ho ke jis dayaar mein bikhar gayaa