bhuul jote hain musaafir rasta — Ambareen Haseeb Ambar

jo tum ho to ye kaise maan luun main
ki jo kuchh hai yahaan bas ik gumaan hai

— Ambareen Haseeb Ambar

duniyaa to ham se haath milaane ko aai thi
ham ne hi eatibaar dobaara nahin kiyaa

— Ambareen Haseeb Ambar

is aarzi duniyaa mein har baat adhuri hai
har jiit hai laa-haasil har maat adhuri hai

— Ambareen Haseeb Ambar

ham to sunte the ki mil jaate hain bichhDe hue log
tu jo bichhDaa hai to kyaa vaqt ne gardish nahin ki

— Ambareen Haseeb Ambar

faisla bichhaDne kaa kar liyaa hai jab tum ne
phir miri tamannaa kyaa phir miri ijaazat kyuun

— Ambareen Haseeb Ambar

taalluq jo bhi rakkho soch lenaa
ki ham rishta nibhaanaa jaante hain

— Ambareen Haseeb Ambar

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

— Jafar Shirazi

safar mein aise kai marhale bhi aate hain
har ek moD pe kuchh log chhuT jaate hain

— Aabid Adeeb

dimaagh un ke tajassus mein jism ghar mein rahaa
main apne ghar hi mein rahte hue safar mein rahaa

— Anjum Siddiqui

yuun to maujud apne ghar mein hai
aadmi mustaqil safar mein hai

— Saleem Amrohvi

kin manzilon luTe hain mohabbat ke qaafile
insaan zamin pe aaj gharib-ul-vatan saa hai

— Ada Jafarey