ye baadshaah nahin hai faqir hai suraj — Anjum Barabankvi

ghair to aansu pochheinge
dhokaa deinge apne log

mujhe sone ki qimat mat bataao
main miTTi huun miri azmat bahut hai

jo doston ki mohabbat se ji nahin bhartaa
to aastin mein do-chaar saanp paal ke rakh

jis baat kaa matlab khushbu hai har gaanv ke kachche raste par
us baat kaa matlab badlegaa jab pakki saDak aa jaaegi

mashhur bhi hain badnaam bhi hain khushiyon ke nae paighaam bhi hain
kuchh gham ke baDe inaam bhi hain paDhiye to kahaani kaam ki hai

zaraa mahfuz raston se guzarnaa
tumhaari shahr mein shohrat bahut hai

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

shor din ko nahin sone detaa
shab ko sannaaTaa jagaa detaa hai

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

didani hai ab shikast-e-zabt ki be-chaargi
muskuraataa huun magar dil dard se labrez hai