hamin ne raaston ki khaak chhaani — Arif Abdul Mateen

kabhi khayaal ke rishton ko bhi TaTol ke dekh
main tujh se duur sahi tujh se kuchh judaa bhi nahin

chaand mere ghar mein utraa thaa kahin Duubaa na thaa
ai mire suraj abhi aanaa tiraa achchhaa na thaa

vafaa nigaah ki taalib hai imtihaan ki nahin
vo meri ruuh mein jhaanke na aazmaae mujhe

zaat kaa aaina jab dekhaa to hairaani hui
main na thaa goyaa koi mujh saa thaa mere ru-ba-ru

thaa e'timaad-e-husn se tu is qadar tahi
aaina dekhne kaa tujhe hausla na thaa

titliyaan rangon kaa mahshar hain kabhi sochaa na thaa
un ko chhune par khulaa vo raaz jo khultaa na thaa!