Chaand

justujū kho.e huoñ kī umr bhar karte rahe
chāñd ke hamrāh ham har shab safar karte rahe

yaqīn chāñd pe sūraj meñ e'tibār bhī rakh
magar nigāh meñ thoḌā sā intizār bhī rakh

supurd kar ke use chāñdnī ke hāthoñ meñ
maiñ apne ghar ke añdheroñ ko lauT ā.ūñgī

husn ko chāñd javānī ko kañval kahte haiñ
un kī sūrat nazar aa.e to ġhazal kahte haiñ

bachchoñ ke chhoTe hāthoñ ko chāñd sitāre chhūne do
chaar kitābeñ paḌh kar ye bhī ham jaise ho jā.eñge

har shai musāfir har chiiz raahī
kyā chāñd taare kyā murġh o maahī

mirī fazā meñ hai tartīb-e-kā.enāt kuchh aur
ajab nahīñ jo tirā chāñd hai sitāra mujhe

na itnā zulm kar ai chāñdnī bahr-e-ḳhudā chhup jā
tujhe dekhe se yaad aatā hai mujh ko māhtāb apnā

havā shāḳhoñ meñ rukne aur ulajhne ko hai is lamhe
guzarte bādaloñ meñ chāñd haa.il hone vaalā hai

''aap kī yaad aatī rahī raat bhar''
chāñdnī dil dukhātī rahī raat bhar

ham itnī raushnī meñ dekh bhī sakte nahīñ us ko
so apne aap hī is chāñd ko gahnā.e rakhte haiñ

vaqt hai ab namāz-e-maġhrib kā
chāñd ruḳh lab shafaq hai gesū shaam

yuuñ sajā chāñd ki jhalkā tire andāz kā rañg
yuuñ fazā mahkī ki badlā mire hamrāz kā rañg

itne ghane bādal ke pīchhe
kitnā tanhā hogā chāñd

duur ke chāñd ko DhūñDo na kisī āñchal meñ
ye ujālā nahīñ āñgan meñ samāne vaalā

baat vo aadhī raat kī raat vo puure chāñd kī
chāñd bhī ain chait kā us pe tirā jamāl bhī

chāñd ne taan lī hai chādar-e-abr
ab vo kapḌe badal rahī hogī

raat ke shāyad ek baje haiñ
sotā hogā merā chāñd

ham na kahte the ki naqsh us kā nahīñ naqqāsh sahl
chāñd saarā lag gayā tab nīm-ruḳh sūrat huī

haa.e vo log ga.e chāñd se milne aur phir
apne hī TuuTe hue ḳhvāb uThā kar le aa.e