chaand mere ghar mein utraa thaa kahin Duubaa na thaa — Arif Abdul Mateen

kabhi khayaal ke rishton ko bhi TaTol ke dekh
main tujh se duur sahi tujh se kuchh judaa bhi nahin

vafaa nigaah ki taalib hai imtihaan ki nahin
vo meri ruuh mein jhaanke na aazmaae mujhe

hamin ne raaston ki khaak chhaani
hamin aae hain tere paas chal ke

zaat kaa aaina jab dekhaa to hairaani hui
main na thaa goyaa koi mujh saa thaa mere ru-ba-ru

thaa e'timaad-e-husn se tu is qadar tahi
aaina dekhne kaa tujhe hausla na thaa

titliyaan rangon kaa mahshar hain kabhi sochaa na thaa
un ko chhune par khulaa vo raaz jo khultaa na thaa!

vo chaand hai to aks bhi paani mein aaegaa
kirdaar khud ubhar ke kahaani mein aaegaa

muddaton baa'd kabhi ai nazar aane vaale
iid kaa chaand na dekhaa tiri surat dekhi

haath mein chaand jahaan aayaa muqaddar chamkaa
sab badal jaaegaa qismat kaa likhaa jaam uThaa

mahlon mein ham ne kitne sitaare sajaa diye
lekin zamin se chaand bahut duur ho gayaa

jali hain dhuup mein shaklein jo maahtaab ki thiin
khinchi hain kaanTon pe jo pattiyaan gulaab ki thiin

chaand sitaare jhiil samundar murat teri kyaa dekhun
Duub gayaa aankhon ke andar surat teri kyaa dekhun