mujhe mat chheDiye yaaron ki ab main — Ashwini Yadav

man mein aayaa pahle tum ko taa'ne duun
khair haTaao aur bataao kaise ho

har ik aansu kaa badlaa ho saktaa hai
ye moti angaare bhi ban sakte hain

duniyaa tire suraagh ko ab paa gayaa huun main
lailaa se laa-ilaah talak aa gayaa huun main

mujhe chhoD kar jo chalaa gayaa use yaad karne se kyaa gharaz
jo Thahar gae unhein shukriya jo chale gae unhein alvidaaa’

zinda rahte milne vaale laakhon hain
mayyat par har girtaa aansu daulat hai

ek 'arse ke baa'd main ne tumhein dekhaa hai
ek 'arse ke baa'd phir se mujhe pyaar huaa

jab ki pahlu se yaar uThtaa hai
dard be-ikhtiyaar uThtaa hai

main sahraa jaa ke qabr-e-hazrat-e-majnun ko dekhaa thaa
ziyaarat karte the aahu bagula tauf kartaa thaa

yaad karnaa har ghaDi tujh yaar kaa
hai vazifa mujh dil-e-bimaar kaa

phuul khulte hi titli bhi aai
kyaa koi dosti puraani hai

ham logon ko paani achchhaa lagtaa hai
ham logon ne miTTi pahni hui hai dost

utni der sameTun saare dukh tere
jitni der ai dost bikhar nahin jaataa main