phuul khulte hi titli bhi aai — Nadir Shahjahanpuri

tu hi vo phuul hai jo hai mahbub
patte patte kaa Daali Daali kaa

nang hai raaz-e-mohabbat kaa numaayaan honaa
mar bhi jaaun main agar tum na pareshaan honaa

rahmat-e-haq ko na kar maayus apne feal se
vo bhalaai mein nahin jo hai buraai mein mazaa

ham dil fidaa karein ki tasadduq-e-jigar karein
jo bhi kahein huzur vahi umr bhar karein

matlab kaa zamaana hai 'naadir' koi kyaa degaa
mujh sokhta-e-qismat ko degaa to khudaa degaa

bhare rahte hain ashk aankhon mein har dam
miri har saans mein ab gham ki bu hai

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

jab ki pahlu se yaar uThtaa hai
dard be-ikhtiyaar uThtaa hai

yaar bhi raah ki divaar samajhte hain mujhe
main samajhtaa thaa mire yaar samajhte hain mujhe

barseingi aaj rahmatein aamad hai yaar ki
naayaab hain ye ghaDiyaan tire intizaar ki

na haraam achchhaa hai yaaro na halaal achchhaa hai
khaa ke pach jaae jo ham ko vahi maal achchhaa hai

sab kuchh paDhaayaa ham ko murdarris ne ishq ke
miltaa hai jis se yaar na aisi paDhaai baat