na-jaane kaun si majburiyaan hain jin ke liye — Athar Nasik

kitne maani rakhtaa hai zaraa ghaur to kar
kuza-gar ke haath mein honaa miTTi kaa

— Athar Nasik

suraj lihaaf oDh ke soyaa tamaam raat
sardi se ik parinda dariche mein mar gayaa

— Athar Nasik

yaqin barson kaa imkaan kuchh dinon kaa huun
main tere shahr mein mehmaan kuchh dinon kaa huun

— Athar Nasik

main use subh na jaanun jo tire sang nahin
main use shaam na maanun ki jo tere bin hai

— Athar Nasik

main puchh letaa huun yaaron se rat-jagon kaa sabab
magar vo mujh se mire khvaab puchh lete hain

— Athar Nasik

banaanaa paDtaa hai apne badan ko chhat apni
aur apne saae ko divaar karnaa paDtaa hai

— Athar Nasik

kyon tasavvur mein ji rahaa huun main
jab haqiqat mein mar hi jaanaa hai

— Divyansh Rawat

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

jism-e-aazaadi mein phunki tu ne majburi ki ruuh
khair jo chaahaa kiyaa ab ye bataa ham kyaa karein

— Fani Badayuni

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa

— Arshad Jamal Sarim

ijz-o-niyaaz apnaa apni taraf hai saaraa
is musht-e-khaak ko ham masjud jaante hain

— Mir Taqi Mir

vahaan hamaaraa koi muntazir nahin phir bhi
hamein na rok ki ghar jaanaa chaahte hain ham

— Wali Aasi