milan ke baa'd aati hai judaai — Faheem Jogapuri

rah gai hai kuchh kami to kyaa shikaayat hai 'fahim'
is jahaan mein sab adhure hain mukammal kaun hai

band kamre mein tiraa dard na bujh jaae kahin
khiDkiyaan khol ki ye aag havaa chaahti hai

shaam khaamosh hai peDon pe ujaalaa kam hai
lauT aae hain sabhi ek parinda kam hai

teri yaadein ho gaiin jaise muqaddas aayatein
chain aataa hi nahin dil ko tilaavat ke baghair

kitne tufaanon se ham uljhe tujhe maalum kyaa
peD ke dukh-dard kaa phulon se andaaza na kar

vaaqif kahaan zamaana hamaari uDaan se
vo aur the jo haar gae aasmaan se

yahaan pe hansnaa ravaa hai ronaa hai be-hayaai
suqut-e-shahr-e-junun kaa maatam zaraa alag hai

qalam mein zor jitnaa hai judaai ki badaulat hai
milan ke baa'd likhne vaale likhnaa chhoD dete hain

gham-e-firaaq ko siine se lag ke sone do
shab-e-tavil ki hogi sahar kabhi na kabhi

kal raat jagaati rahi ik khvaab ki duuri
aur niind bichhaati rahi bistar mire aage

maahaul sab kaa ek hai aanhkein vahi nazrein vahi
sab se alag raahein miri sab se judaa manzar miraa

alag baiThe the phir bhi aankh saaqi ki paDi ham par
agar hai tishnagi kaamil to paimaane bhi aaeinge