laDkiyaan maaon jaise muqaddar kyuun rakhti hain — Ishrat Afreen

vo zakhm chun ke mire khaar mujh mein chhoD gayaa
ki us ko shauq thaa be-intihaa gulaabon kaa

— Ishrat Afreen

kachchi umron mein bhi akeli rahi
main sadaa apni hi saheli rahi

— Ishrat Afreen

yaa mujhe teri hatheli bujhe
yaa koi shokh saheli bujhe

— Ishrat Afreen

bhuuk se yaa vabaa se marnaa hai
faisla aadmi ko karnaa hai

— Ishrat Afreen

shaam ko teraa hans kar milnaa
din bhar ki ujrat hoti hai

— Ishrat Afreen

avval ahl-e-qabila ne parcham banaayaa use aur phir
pesh-e-dushman bhi taavaan mein sirf meri ridaa le gae

— Ishrat Afreen

ret par ik nishaan hai shaayad
ye hamaaraa makaan hai shaayad

— Muzaffar Abdali

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

— Irfan Sattar

pyaaso raho na dasht mein baarish ke muntazir
maaro zamin pe paanv ki paani nikal paDe

— Iqbal Sajid

ghulaami mein na kaam aati hain shamshirein na tadbirein
jo ho zauq-e-yaqin paidaa to kaT jaati hain zanjirein

— Allama Iqbal