yahi hasti isi hasti ke kuchh TuuTe hue rishte — Jagat Mohan Lal Ravan

hanse bhi roe bhi lekin na samjhe
khushi kyaa chiiz hai duniyaa mein gham kyaa

pesh to hogaa adaalat mein muqadmaa be-shak
jurm qaatil hi ke sar ho ye zaruri to nahin

saamne taarif ghibat mein gila
aap ke dil ki safaai dekh li

abhi tak fasl-e-gul mein ik sadaa-e-dard aati hai
vahaan ki khaak se pahle jahaan thaa aashiyaan meraa

kuchh iztiraab-e-ishq kaa aalam na puchhiye
bijli taDap rahi thi ki jaan is badan mein thi

vo baada-nosh haqiqat hai is jahaan mein 'ravaan'
ki jhuum jaae falak gar use khumaar aae