hanse bhi roe bhi lekin na samjhe — Jagat Mohan Lal Ravan

yahi hasti isi hasti ke kuchh TuuTe hue rishte
vagarna aisaa parda mere un ke darmiyaan kyaa thaa

pesh to hogaa adaalat mein muqadmaa be-shak
jurm qaatil hi ke sar ho ye zaruri to nahin

saamne taarif ghibat mein gila
aap ke dil ki safaai dekh li

abhi tak fasl-e-gul mein ik sadaa-e-dard aati hai
vahaan ki khaak se pahle jahaan thaa aashiyaan meraa

kuchh iztiraab-e-ishq kaa aalam na puchhiye
bijli taDap rahi thi ki jaan is badan mein thi

vo baada-nosh haqiqat hai is jahaan mein 'ravaan'
ki jhuum jaae falak gar use khumaar aae

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

us pe qurbaan ki jis ne tiri aavaaz suni
sadqe us aankh ke jis ne tiraa jalva dekhaa

bahut ghurur thaa biphre hue samundar ko
magar jo dekhaa mire aansuon se kam-tar thaa

Thahri thi ghizaa apni jo gham ishq-e-butaan mein
so aah hamaari hamein khuraak ne khaayaa