shiddat-e-tishna-labi aaj kahaan laai hai — Malika Naseem

khvaab Thahre the to aankhein bhigne se bach gaiin
varna chehre par to gham ki baarishon kaa aks hai

main kisi aur ko dekhun bhi to dekhun kaise
us ke khvaabon ki in aankhon pe nigahbaani hai

vo laDkiyaan ki jo lagti thiin saada tahrirein
paDhi gaiin to anokhi paheliyaan niklin

har daur kaa jo aks hai vo aaina hain ham
takhliq-e-kaaenaat kaa ik silsila hain ham

umr guzri ik nigaah-e-lutf ki ummid mein
ham ko apne hauslon ki ye adaa achchhi lagi

kar gaiin maujein sharaarat jab bhi likkhaa teraa naam
ret par jitni lakirein thiin vo sab mil-jul gaiin