khile dhaan khilkhilaa kar paDe naddiyon mein naake — Nasir Shahzad

dariyaa pe Tikri se pare khaanqaah thi
tab tere mere pyaar ki duniyaa gavaah thi

dekhaa qad-e-gunaah pe jab is ko multafit
baDh kar had-e-nigaah lagi us ko Dhaanpne

yaad aae tu mujh ko bahut jab shab kaTe jab pau phaTe
jab vaadiyon mein duur tak kohraa dikhe be-ant saa

hijraton mein huzuriyon ke jatan
paanv ko duriyon ne gheraa hai

paaTi hain ham ne biphri chanaabein tire liye
ham le gae hain tujh ko svayamvar se jiit ke

ek kaaTaa raam ne siitaa ke saath
dusraa ban boss mere naam par

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

shor din ko nahin sone detaa
shab ko sannaaTaa jagaa detaa hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

ye husn-e-dil-fareb ye aalam shabaab kaa
goyaa chhalak rahaa hai piyaala sharaab kaa

tere shabaab ne kiyaa mujh ko junun se aashnaa
mere junun ne bhar diye rang tiri shabaab mein