ye husn-e-dil-fareb ye aalam shabaab kaa — Asar Sahbai

tumhaari yaad mein duniyaa ko huun bhulaae hue
tumhaare dard ko siine se huun lagaae hue

tere shabaab ne kiyaa mujh ko junun se aashnaa
mere junun ne bhar diye rang tiri shabaab mein

jis husn ki hai chashm-e-tamannaa ko justuju
vo aaftaab mein hai na hai maahtaab mein

ilaahi kashti-e-dil bah rahi hai kis samundar mein
nikal aati hain maujein ham jise saahil samajhte hain

saari duniyaa se be-niyaazi hai
vaah ai mast-e-naaz kyaa kahnaa

aah kyaa kyaa aarzuein nazr-e-hirmaan ho gaiin
roiye kis kis ko aur kis kis kaa maatam kijiye

dil liyaa aur bevafaai ki
daad detaa huun dilrubaai ki

dhoka hai ik fareb hai manzil kaa har khayaal
sach puchhiye to saaraa safar vaapsi kaa hai

us bevafaa kaa shahr hai aur vaqt-e-shaam hai
aaise mein aarzu baDi himmat kaa kaam hai

main kis tarah tujhe ilzaam-e-bevafaai duun
rah-e-vafaa mein tire naqsh-e-paa bhi milte hain

kamar dhokaa dahan uqda ghazaal aankhein pari chehra
shikam hiiraa badan khushbu jabin dariyaa zabaan iisaa

bevafaai ki jab bhi baat chali
baa-khudaa tum bahut hi yaad aae