ahbāb ko de rahā huuñ dhokā — Qateel Shifai

kis tarah apnī mohabbat kī maiñ takmīl karūñ
ġham-e-hastī bhī to shāmil hai ġham-e-yār ke saath

subūt-e-ishq kī ye bhī to ek sūrat hai
ki jis se pyaar kareñ us pe tohmateñ bhī dhareñ

rahegā saath tirā pyaar zindagī ban kar
ye aur baat mirī zindagī vafā na kare

raqs karne kā milā hukm jo dariyāoñ meñ
ham ne ḳhush ho ke bhañvar bāñdh liyā paañv meñ

nikal kar dair-o-ka.aba se agar miltā na but-ḳhāna
to Thukrā.e hue insāñ ḳhudā jaane kahāñ jaate

sitam to ye hai ki vo bhī na ban sakā apnā
qubūl ham ne kiye jis ke ġham ḳhushī kī tarah

us ne mujhe dar-asl kabhī chāhā hī nahīñ thā
ḳhud ko de kar ye bhī dhokā, dekh liyā hai

phir usī bevafā pe marte haiñ
phir vahī zindagī hamārī hai

duniyā ne terī yaad se begāna kar diyā
tujh se bhī dil-fareb haiñ ġham rozgār ke

chalā thā zikr zamāne kī bevafā.ī kā
so aa gayā hai tumhārā ḳhayāl vaise hī

lo phir tire laboñ pe usī bevafā kā zikr
ahmad 'farāz' tujh se kahā na bahut huā

us bevafā ne ham ko agar apne ishq meñ
rusvā kiyā ḳharāb kiyā phir kisī ko kyā