maut aa jaae vabaa mein ye alag baat magar — Sabir Aafaque

cup mein garmi dikhaa rahi thi bahut
chaae saucer mein Daal di main ne

mujh ko lagtaa hai ghaDi jis ne banaai hogi
intizaar us ko bhi shiddat se kisi kaa hogaa

puchh us shakhs se main jis ko nahin mil paayaa
main tujhe jitnaa mayassar huun tiri qismat hai

bahut hi khushki mein guzri hai is baras holi
gila hai tujh se ki giilaa nahin kiyaa mujh ko

vasl ko maan ke taraste hain mire bachche bhi
kaifiyat hijr ki mujh par hi nahin taari hai

andhere kaa tasavvur kyaa hai bolun
andheraa raushni se chal rahaa hai

vo mil gayaa to bichhaDnaa paDegaa phir 'zarrin'
isi khayaal se ham raaste badalte rahe

ye naazuk lab hain yaa aapas mein do lipTi hui kaliyaan
zaraa in ko alag kar do tarannum phuuT jaaeinge

ik chhoTaa saa thaa meraa aashiyaan
aaj tinke se alag tinkaa huaa

judaai se ziyaada jaan-levaa
mohabbat mein mohabbat ki kami hai

raushni khud bhi charaaghon se alag rahti hai
dil mein jo rahte hain vo dil nahin hone paate

tire tasavvur ki dhuup oDhe khaDaa huun chhat par
mire liye sardiyon kaa mausam zaraa alag hai