maiñ ne chāhā thā ki ashkoñ kā tamāshā dekhūñ — Shayari Of Saqi Faruqi

nāmoñ kā ik hujūm sahī mere ās-pās
dil sun ke ek naam dhaḌaktā zarūr hai

vahī jiine kī āzādī vahī marne kī jaldī hai
divālī dekh lī ham ne dasahre kar liye ham ne

pyaas baḌhtī jā rahī hai bahtā dariyā dekh kar
bhāgtī jaatī haiñ lahreñ ye tamāshā dekh kar

tamām jism kī uryāniyāñ thiiñ āñkhoñ meñ
vo merī ruuh meñ utrā hijāb pahne hue

tujh se milne kā rāsta bas ek
aur bichhaḌne ke rāste haiñ bahut

vahī āñkhoñ meñ aur āñkhoñ se poshīda bhī rahtā hai
mirī yādoñ meñ ik bhūlā huā chehrā bhī rahtā hai