Shayari Of Saqi Faruqi

vahī jiine kī āzādī vahī marne kī jaldī hai
divālī dekh lī ham ne dasahre kar liye ham ne

nāmoñ kā ik hujūm sahī mere ās-pās
dil sun ke ek naam dhaḌaktā zarūr hai

tujh se milne kā rāsta bas ek
aur bichhaḌne ke rāste haiñ bahut

vahī āñkhoñ meñ aur āñkhoñ se poshīda bhī rahtā hai
mirī yādoñ meñ ik bhūlā huā chehrā bhī rahtā hai

maiñ ne chāhā thā ki ashkoñ kā tamāshā dekhūñ
aur āñkhoñ kā ḳhazāna thā ki ḳhālī niklā

tamām jism kī uryāniyāñ thiiñ āñkhoñ meñ
vo merī ruuh meñ utrā hijāb pahne hue

pyaas baḌhtī jā rahī hai bahtā dariyā dekh kar
bhāgtī jaatī haiñ lahreñ ye tamāshā dekh kar

tum aur kisī ke ho to ham aur kisī ke
aur donoñ hī qismat kī shikāyat nahīñ karte

maiñ un se bhī milā kartā huuñ jin se dil nahīñ miltā
magar ḳhud se bichhaḌ jaane kā andesha bhī rahtā hai

maiñ apne shahr se māyūs ho ke lauT aayā
purāne sog base the na.e makānoñ meñ

qatl karne kā irāda hai magar sochtā huuñ
tū agar aa.e to hāthoñ meñ jhijak paidā ho

ḳhudā ke vāste mauqā na de shikāyat kā
ki dostī kī tarah dushmanī nibhāyā kar