ishq ki tarz-e-takallum vahi chup hai ki jo thi — Syed Aabid Ali Aabid

unhin ko arz-e-vafaa kaa thaa ishtiyaaq bahut
unhin ko arz-e-vafaa naa-gavaar guzri hai

— Syed Aabid Ali Aabid

gham ke taarik ufuq par 'aabid'
kuchh sitaare sar-e-mizhgaan guzre

— Syed Aabid Ali Aabid

shara-o-aain ki taazir ke baa-vasf shabaab
lab-o-rukhsaar ki jaanib nigaraan hai ki jo thaa

— Syed Aabid Ali Aabid

subu uThaa ki ye naazuk maqaam hai saaqi
na ahrman hai na yazdaan hai dekhiye kyaa ho

— Syed Aabid Ali Aabid

ik din us ne nain milaa ke sharmaa ke mukh moDaa thaa
tab se sundar sundar sapne man ko ghere phirte hain

— Syed Aabid Ali Aabid

meraa jiinaa hai sej kaanTon ki
un ke marne kaa naam taaj-mahal

— Syed Aabid Ali Aabid

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

— Ibn

sabhi se jab mohabbat chaahte ho
mohabbat kyon nahin karte sabhi se

— Saleem Amrohvi

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

— Haidar Ali Aatish

baat karnaa pyaar ki aasaan se aasaan hai
ishq karnaa karte rahnaa hai kaThin se bhi kaThin

— Raghvendra Dwivedi

kisi se ishq apnaa kyaa chhupaaein
mohabbat Tapki paDti hai nazar se

— Meer Mehdi Majrooh