abhi is raah se koi gayaa hai — Taskeen Dehlavi

qaasid aayaa hai vahaan se tu zaraa tham to sahi
baat to karne de us se dil-e-betaab mujhe

— Taskeen Dehlavi

kahe deti hain ye nichi nigaahein
ki baalaa-e-zamin kyaa kyaa na hogaa

— Taskeen Dehlavi

itni na kiije jaane ki jaldi shab-e-visaal
dekhe hain main ne kaam bigaDte shitaab mein

— Taskeen Dehlavi

puchhe jo tujh se koi ki 'taskin' se kyuun milaa
kah diijo haal dekh ke rahm aa gayaa mujhe

— Taskeen Dehlavi

taskin' karun kyaa dil-e-muztar kaa ilaaj ab
kam-bakht ko mar kar bhi to aaraam na aayaa

— Taskeen Dehlavi

jis vaqt nazar paDti hai us shokh pe 'taskin'
kyaa kahiye ki ji mein mere kyaa kyaa nahin hotaa

— Taskeen Dehlavi

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

— Jafar Shirazi

safar mein aise kai marhale bhi aate hain
har ek moD pe kuchh log chhuT jaate hain

— Aabid Adeeb

yuun to maujud apne ghar mein hai
aadmi mustaqil safar mein hai

— Saleem Amrohvi

kin manzilon luTe hain mohabbat ke qaafile
insaan zamin pe aaj gharib-ul-vatan saa hai

— Ada Jafarey

dimaagh un ke tajassus mein jism ghar mein rahaa
main apne ghar hi mein rahte hue safar mein rahaa

— Anjum Siddiqui