taskin' karun kyaa dil-e-muztar kaa ilaaj ab — Taskeen Dehlavi

qaasid aayaa hai vahaan se tu zaraa tham to sahi
baat to karne de us se dil-e-betaab mujhe

kahe deti hain ye nichi nigaahein
ki baalaa-e-zamin kyaa kyaa na hogaa

itni na kiije jaane ki jaldi shab-e-visaal
dekhe hain main ne kaam bigaDte shitaab mein

puchhe jo tujh se koi ki 'taskin' se kyuun milaa
kah diijo haal dekh ke rahm aa gayaa mujhe

abhi is raah se koi gayaa hai
kahe deti hai shokhi naqsh-e-paa ki

jis vaqt nazar paDti hai us shokh pe 'taskin'
kyaa kahiye ki ji mein mere kyaa kyaa nahin hotaa

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

mujhe khabar hi nahin thi ki ishq kaa aaghaaz
ab ibtidaa se nahin darmiyaan se hotaa hai

jahaan ho pyaar ghalat-fahmiyaan bhi hoti hain
so baat baat pe yuun dil buraa nahin karte

aag paani se bhaap uThti rahi
ham samajhte rahe mohabbat hai