nahin maalum kitne ho chuke hain imtihaan ab tak — Wasif Dehlvi

bujhte hue charaagh farozaan kareinge ham
tum aaoge to jashn-e-charaaghaan kareinge ham

— Wasif Dehlvi

didaar se pahle hi kyaa haal huaa dil kaa
kyaa hogaa jo ulTeinge vo rukh se naqaab aakhir

— Wasif Dehlvi

kitni ghaTaaein aaiin baras kar guzar gaiin
shola hamaare dil kaa bujhaayaa na jaa sakaa

— Wasif Dehlvi

daaman ke daagh ashk-e-nadaamat ne dho diye
lekin ye dil kaa daagh miTaayaa na jaa sakaa

— Wasif Dehlvi

aaj rukhsat ho gayaa duniyaa se ik bimaar-e-gham
dard aisaa dil mein uTThaa jaan le kar hi gayaa

— Wasif Dehlvi

qismat ki tirgi ki kahaani na puchhiye
subh-e-vatan bhi shaam-e-gharibaan hai aaj kal

— Wasif Dehlvi

zindagi phaili hui thi shaam-e-hijraan ki tarah
kis ko itnaa hausla thaa kaun ji kar dekhtaa

— Ahmad Faraz

hausla hai to safinon ke alam lahraao
bahte dariyaa to chaleinge isi raftaar ke saath

— Shahzad Ahmad

vo agar inkaar kar de baat us ki maan lo
“ishq karne ke liye itni to himmat chaahiye”

— Raghvendra Dwivedi

sakhtiyaan baDh rahin hain aalam ki
hausle muskuraae jaate hain

— Unknown

kaThin hai kaam to himmat se kaam le ai dil
bigaaD kaam na mushkil samajh ke mushkil ko

— Wahshat Raza Ali Kalkatvi

himmat kaa zaahidon ki saraasar qusur thaa
mai-khaana khaanqaah se aisaa na duur thaa

— Asad Ali Khan Qalaq