sakhtiyaan baDh rahin hain aalam ki — Unknown

log kaanTon se bach ke chalte hain
main ne phulon se zakhm khaae hain

dil TuTne se thoDi si taklif to hui
lekin tamaam umr ko aaraam ho gayaa

duniyaa mein vahi shakhs hai taazim ke qaabil
jis shakhs ne haalaat kaa rukh moD diyaa ho

miri namaaz-e-janaaza paDhi hai ghairon ne
mare the jin ke liye vo rahe vazu karte

ye hamin hain ki tiraa dard chhupaa kar dil mein
kaam duniyaa ke ba-dastur kiye jaate hain

jin ke kirdaar se aati ho sadaaqat ki mahak
un ki tadris se patthar bhi pighal sakte hain

tirgi mein aadmi ko hausla dete hue
har sitaare ko farishta maan lenaa chaahiye

thaa e'timaad-e-husn se tu is qadar tahi
aaina dekhne kaa tujhe hausla na thaa

ki ik nazar ki tuur saraapaa jalaa diyaa
kis hausle pe koi tiri aarzu kare

savaal karne ke hausle se javaab dene ke faisle tak
jo vaqfa-e-sabr aa gayaa thaa usi ki lazzat mein aa basaa huun

harf saare bol uTThein jab bhi main likhne lagun
ab koi jazba miraa mahv-e-duaa lagtaa nahin

ye soch kar tiri mahfil se ham chale aae
ki ek baar to baDh jaae hausla dil kaa