chhat Tapakti thi agarche phir bhi aa jaati thi niind — Zafar Gorakhpuri

apne atvaar mein kitnaa baDaa shaatir hogaa
zindagi tujh se kabhi jis ne shikaayat nahin ki

kitni aasaani se mashhur kiyaa hai khud ko
main ne apne se baDe shakhs ko gaali de kar

abhi zinda hain ham par khatm kar le imtihaan saare
hamaare baad koi imtihaan koi nahin degaa

meri ik chhoTi si koshish tujh ko paane ke liye
ban gai hai masala saare zamaane ke liye

aasmaan aisaa bhi kyaa khatra thaa dil ki aag se
itni baarish ek shole ko bujhaane ke liye

dekhein qarib se bhi to achchhaa dikhaai de
ik aadmi to shahr mein aisaa dikhaai de