abhi zinda hain ham par khatm kar le imtihaan saare — Zafar Gorakhpuri

apne atvaar mein kitnaa baDaa shaatir hogaa
zindagi tujh se kabhi jis ne shikaayat nahin ki

kitni aasaani se mashhur kiyaa hai khud ko
main ne apne se baDe shakhs ko gaali de kar

chhat Tapakti thi agarche phir bhi aa jaati thi niind
main nae ghar mein bahut royaa puraane ke liye

meri ik chhoTi si koshish tujh ko paane ke liye
ban gai hai masala saare zamaane ke liye

aasmaan aisaa bhi kyaa khatra thaa dil ki aag se
itni baarish ek shole ko bujhaane ke liye

dekhein qarib se bhi to achchhaa dikhaai de
ik aadmi to shahr mein aisaa dikhaai de

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

gham hai na ab khushi hai na ummid hai na yaas
sab se najaat paae zamaane guzar gae

main jis mein rah na sakaa ji-huzuriyon ke sabab
ye aadmi hai usi kaamyaab mausam kaa