Akhlaq Ahmad Ahan

pinhan hain sad-saval pas-e-parda-e-haya
dil de diya javab tha lekin rahe khamosh

tera jalva hai aaj tauba-shikan
aao shauq-e-hijab rahne do

ye kaisi jagah hai ki dil kho raha hai
bayaban hai sahra hai gulshan hai kya hai

sitaron ki gardish dilon ka bichhaDna
ye kaise khuda ki hai kaisi khuda.i

vo jaadu ada.en adaon men jaadu
ye pahuncha.en ham ko fana se baqa tak

ik mauj-e-gham-gazidgi se hain niDhal sab
a.ina-e-durust men sab hi sarab-posh

zo'm-e-tuqaa hijaab-e-tazaahur nifaaq kaa
har jaa raqam hai is mein bhi izn o qum-e-darogh

ai jamaal-e-be-badal lekin adaa mein be-rukhi
ho gaiin sadiyaan ki chashm-e-tishna teri muntazir

zaat-e-khaaKi ki tahon mein khufta hain anvaa’-e-khaak
rang-haa-e-tah-ba-tah kaa pech-o-kham kuchh aur hai

luTaa ye kaarvaan kab kaa na jaane kaun thi manzil
magar ahbaab ab bhi zo'm-e-chughtaai mein jiite hain

ye kaisi jagah hai ki dil kho rahaa hai
bayaabaan hai sahraa hai gulshan hai kyaa hai

sitaaron ki gardish dilon kaa bichhaDnaa
ye kaise khudaa ki hai kaisi khudaai