sitaaron ki gardish dilon kaa bichhaDnaa — Akhlaq Ahmad Ahan

ai jamaal-e-be-badal lekin adaa mein be-rukhi
ho gaiin sadiyaan ki chashm-e-tishna teri muntazir

zaat-e-khaaKi ki tahon mein khufta hain anvaa’-e-khaak
rang-haa-e-tah-ba-tah kaa pech-o-kham kuchh aur hai

luTaa ye kaarvaan kab kaa na jaane kaun thi manzil
magar ahbaab ab bhi zo'm-e-chughtaai mein jiite hain

ye kaisi jagah hai ki dil kho rahaa hai
bayaabaan hai sahraa hai gulshan hai kyaa hai

vo jaadu adaaein adaaon mein jaadu
ye pahunchaaein ham ko fanaa se baqaa tak

zo'm-e-tuqaa hijaab-e-tazaahur nifaaq kaa
har jaa raqam hai is mein bhi izn o qum-e-darogh

main baDaa ho gayaa huun magar bachpanaa
mere dil se kabhi bhi gayaa hi nahin

badalte vaqt ne badle mizaaj bhi kaise
tiri adaa bhi gai meraa baankpan bhi gayaa

'saif' andaaz-e-bayaan rang badal detaa hai
varna duniyaa mein koi baat nai baat nahin

yuun to milne ko log milte hain
dil magar kam kisi se miltaa hai

kaun aaegaa bhuul kar rasta
dil ko kyuun zid hai ghar sajaane ki

ab raqib-e-bul-havas hain ishq-baaz
dil lagaane se bhi nafrat ho gai