Aleena Itrat

shadid dhuup men saare darakht suukh ga.e
bas ik dua ka shajar tha jo be-samar na hua

abhi to chaak pe jaari hai raqs miTTi ka
abhi kumhar ki niyyat badal bhi sakti hai

apni muTThi men chhupa kar kisi jugnu ki tarah
ham tire naam ko chupke se paDha karte hain

koi avaz na aahaT na koi halchal hai
aisi khamoshi se guzre to guzar ja.enge

koi mila hi nahin jis se hal-e-dil kahte
mila to rah ga.e lafzon ke intikhab men ham

udasi shaam tanha.i kasak yadon ki bechaini
mujhe sab saunp kar suraj utar jaata hai paani men

andheri shab kaa ye khvaab-manzar mujhe ujaalon se bhar rahaa hai
to raat itni tavil kar de ki taa-qayaamat sahar na aae

husn-o-jamaal-o-zist ki aaraaishein fuzul
ishq-o-junun ki aag jo dil mein javaan na ho

lo hamaaraa javaab le jaao
ye mahaktaa gulaab le jaao

Thiik hai jaao ta'alluq na rakheinge ham bhi
tum bhi vaada karo ab yaad nahin aaoge

jin ke mazbut iraade bane pahchaan un ki
manzilein aap hi ho jaati hain aasaan un ki

dil ke gulshan mein tire pyaar ki khushbu paa kar
rang rukhsaar pe phulon se khilaa karte hain