Meer Hasan

jan-o-dil hain udaas se mere
uTh gaya kaun paas se mere

itne aansu to na the dida-e-tar ke aage
ab to paani hi bhara rahta hai ghar ke aage

iz.har-e-khamoshi men hai sau tarah ki fariyad
zahir ka ye parda hai ki main kuchh nahin kahta

qismat ne duur aisa hi phenka hamen ki ham
phir jite-ji pahunch na sake apne yaar tak

go bhale sab hain aur main huun bura
kya bhalon men bura nahin hota

hai yahi shauq shahadat ka agar dil men to ishq
le hi pahunchega hamen bhi tiri shamshir talak

rakhkhun kahaan main apne pari-zaad ko 'hasan'
shisha jo ek dil kaa mire hai so chuur hai

mat ponchh abru-e-araq-aalud haath se
laazim hai ehtiyaat ki hai aab-daar tegh

taaki ibrat karein aur ghair na dekhein tujh ko
ji mein aataa hai nikalvaaiye do-chaar ki aankh

guzri hai raat mujh mein aur dil mein turfa sohbat
idhar to main ne ki aah udhar se vo karaahaa

mat bakht-e-khufta par mire hans ai raqib tu
hogaa tire nasib bhi ye khvaab dekhnaa

na gharaz mujh ko hai kaafir se na din-daar se kaam
roz-o-shab hai mujhe us kaakul-e-khamdaar se kaam