Shaukat Pardesi

'shaukat' vo aaj aap ko pahchan to ga.e
apni nigah men jo kabhi asman rahe

mauj-e-tufan se nikal kar bhi salamat na rahe
nazr-e-sahil hue dariya ke shanavar kitne

ahd-e-aghaz-e-tamanna bhi mujhe yaad nahin
mahv-e-hairat huun ki itna bhi mujhe yaad nahin

raat ik nadar ka ghar jal gaya tha aur bas
log to be-vaj.h sannaTe se ghabrane lage

un ki nigah-e-naz ki gardish ke saath saath
mahsus ye hua ki zamana badal gaya

jab maslahat-e-vaqt se gardan ko jhuka kar
vo baat kare hai to koi tiir lage hai

ye kaisi be-qaraari sunne vaalon ke dilon mein hai
varaq dohraa rahaa hai kyaa koi meri kahaani kaa

un ki nigaah-e-naaz ki gardish ke saath saath
mahsus ye huaa ki zamaana badal gayaa

us ki hansi tum kyaa samjho
vo jo pahron royaa hai

ai inqalaab-e-nau tiri raftaar dekh kar
khud ham bhi sochte hain ki ab tak kahaan rahe

sharik-e-dard nahin jab koi to ai 'shaukat'
khud apni zaat ki bechaargi ghanimat hai

hudud-e-jism se aage baDhe to ye dekhaa
ki tishnagi thi barahna tiri adaaon tak