sharik-e-dard nahin jab koi to ai 'shaukat' — Shaukat Pardesi

ye kaisi be-qaraari sunne vaalon ke dilon mein hai
varaq dohraa rahaa hai kyaa koi meri kahaani kaa

un ki nigaah-e-naaz ki gardish ke saath saath
mahsus ye huaa ki zamaana badal gayaa

us ki hansi tum kyaa samjho
vo jo pahron royaa hai

ai inqalaab-e-nau tiri raftaar dekh kar
khud ham bhi sochte hain ki ab tak kahaan rahe

apne paraae thak gae kah kar har koshish bekaar rahi
vaqt ki baat samajh mein aai vaqt hi ke samjhaane se

hudud-e-jism se aage baDhe to ye dekhaa
ki tishnagi thi barahna tiri adaaon tak

jab ki pahlu se yaar uThtaa hai
dard be-ikhtiyaar uThtaa hai

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

do ghaDi niind ki mohlat hai vo gham taak mein hai
jis tarah saanp kaa bachcha koi paa-posh mein ho

puchhte hain log mujh se kyon miraa naam-o-nasab
soch lein paighambaron se silsila mil jaaegaa