na aane ke un ke bahaane bhi dekhe — Bashir Mehtaab

"suhaane sapne aae hain lubhaane sapne aae hain mujhe manzil ki daavat hai bulaane sapne aae hain miri bedaar aankhon ko sajaane sapne aae hain main ik muddat se soyaa thaa jagaane sapne aae hain mujhe paane tum aae ho ganvaane sapne aae hain ye sapne jaa nahin sakte churaane sapne aae hain ye armaan phir se toDeinge dikhaane sapne aae hain nayaa saa khel hai koi puraane sapne aae hain mujhe to aakhiri dam tak hansaane sapne aae hain ajab 'mahtaab' aankhon ke divaane sapne aae hain"

"rukh tumhaaraa ho jidhar ham bhi udhar ho jaaeinge tum se bichhDeinge agar to dar-ba-dar ho jaaeinge zindagaani ke safar mein lutf hogaa tab nasib ham-khayaal-o-ham-navaa jab ham-safar ho jaaeinge aasmaanon kaa safar ham tai kareinge ek roz jab hamaare hauslon mein baal-o-par ho jaaeinge saadgi yunhi agar laade rahe to ek din sab tumhaare apne tum se be-khabar ho jaaeinge dekhnaa jis din unhein maqsad samajh mein aaegaa manzilon ki justuju mein rahguzar ho jaaeinge paude hain urdu adab ke aab-o-daana Daaliye aane vaale kal mein saae aur samar ho jaaeinge saaqi saaghar ki zarurat hi kahaan mere liye teri aankhon ke hi pyaale pur-asar ho jaaeinge vo na jaaeinge kabhi 'mahtaab' zulmat ki taraf vaqt par anjaam se vaaqif agar ho jaaeinge"

"kis masti mein ab rahtaa huun khud ko khud mein DhunD rahaa huun duniyaa mein sab se hi judaa huun aakhir main kis duniyaa kaa huun main to khud ko bhuul chukaa huun tum batlaa do kaun huun kyaa huun ye bhi nahin hai yaad mujhe ab kyuun aakhir rotaa rahtaa huun ik duniyaa hai mere andar us mein hi main ghuum rahaa huun mujh ko niind hai pyaari yaa phir us ko bhi main hi pyaaraa huun vo rukh apnaa pher chuke hain main kis ko apnaa kahtaa huun in lafzon ne manzil chhini aap chalein main abhi aataa huun man to khushiyaan baanT rahaa hai main qatra qatra rotaa huun khud kaa bojh hai kitnaa khud par kitnaa khud ko jhel rahaa huun mujh ko tum 'mahtaab' na samjho shaayad main us kaa saayaa huun"

"maanaa us ko gila nahin mujh se kuchh to hai jo kahaa nahin mujh se haq nahin dosti kaa aisaa koi jo ki us ko milaa nahin mujh se dil hi dil mein vo bughz rakhtaa hai jo ba-zaahir khafaa nahin mujh se kuchh to hogaa zarur is kaa sabab vo jo ab tak laDaa nahin mujh se laakh pichhaa chhuDaanaa chaahaa magar gham huaa hi judaa nahin mujh se kaise rah paaegaa vo mere baghair jo alag hi rahaa nahin mujh se jo ba-zaahir khafaa hai ai 'mahtaab' vo ba-baatin khafaa nahin mujh se"

"sab ki maujudgi samajhtaa hai dil kisi ki kami samajhtaa hai ek hi shakhs se main vaaqif huun jo mujhe ajnabi samajhtaa hai go mujhe jaantaa nahin lekin vo miri shaairi samajhtaa hai vasl ke ashk hijr ke aansu vo nami ko nami samajhtaa hai vahi meri zabaan se hai vaaqif jo miri khaamushi samajhtaa hai aap ke saamne main khush huun magar mere dukh raam hi samajhtaa hai yahi urdu zabaan kaa hai jaadu ab mujhe har koi samajhtaa hai main use baat dil ki kahtaa huun vo use shaairi samajhtaa hai itnaa naadaan bhi nahin hai vo jo tumhaari hansi samajhtaa hai kaun 'mahtaab' ab tumhaaraa hai kaun dil ki lagi samajhtaa hai"

"jab se mire raqib kaa rasta badal gayaa tab se mire nasib kaa naqsha badal gayaa shirin thaa kitnaa aap kaa andaaz-e-guftugu do-chaar sikke aate hi lahja badal gayaa kis ki zabaan se mujhe dekho khabar mujhe kaise mire harif kaa chehra badal gayaa un ke badalne kaa mujhe afsos kuchh nahin afsos ye hai apnaa hi saaya badal gayaa jab se baDon ki ghar se hukumat chali gai jannat-numaa makaan kaa naqsha badal gayaa raahon ki khaak chhaantaa phirtaa huun aaj tak rahbar badal gayaa kabhi rasta badal gayaa kahtaa hai us ke jaane se kuchh bhi nahin huaa 'mahtaab' jabki dil kaa vo Dhaancha badal gayaa"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"Tuut kar ab sanvar gayaa huun main is tarah se bikhar gayaa huun main jo tire naam ki gali hai vo us gali se guzar gayaa huun main yaadein teri sameT laayaa huun aaj jab se udhar gayaa huun main khud mukarnaa sikhaa diyaa us ne phir kahaa ki mukar gayaa huun main kal talak jo na kar sakaa thaa main aaj vo kaam kar gayaa huun main yuun kahin main nahin Thahartaa par tere dar par Thahar gayaa huun main"

"bistar-e-karb pe jab niind jalaai main ne tab kisi khvaab ki buniyaad uThaai main ne zakhm aise the ki har shakhs ke aage rakkhe baat aisi thi ki khud se bhi chhupaai main ne hurmat-e-gham ke liye khud ko aziyyat bakhshi phir usi dard se taskin bhi paai main ne main ne zakhmon ko kuredaa unhein taaza rakkhaa tab kahin dasht mein ki naghma-saraai main ne apni khiDki se yunhi khud ko pukaaraa kal shab aur phir khud ko vo aavaaz sunaai main ne jaane vaale se rag-e-jaan kaa bhi rishta thaa 'samir' ye samajhne mein bahut der lagaai main ne"

"zindagi dushvaar hogi ye kabhi sochaa na thaa vo bagule gham ke uTThe jin kaa andesha na thaa saamne tum aa gae ho to bataa duun jaan-e-jaan jaise dil dhaDkaa thaa ab ki vaise dil dhaDkaa na thaa ye iraada kar liyaa thaa ham na bichhDeinge kabhi TuTeinge ik pal mein rishte ye kabhi sochaa na thaa yaad-e-maazi miT rahi hai vaqt ki raftaar se ab tasavvur mein hamaare koi bhi chehra na thaa sakht hairat ho rahi hai dekh kar apnaa vajud dhuup mein the sab ke saaye par miraa saayaa na thaa shauq-e-manzil dekh meri dekh meraa hausla shahr-e-dil ke raaston mein main kabhi Thahraa na thaa 'qalb' ko sahraa-navardi raas kyaa aati bhalaa vo kabhi aavaargi mein dar-ba-dar bhaTkaa na thaa"

"jahaan-e-dard-o-gham hai aur main huun tiraa naqsh-e-qadam hai aur main huun kisi ki aankh nam hai aur main huun vufur-e-shauq kam hai aur main huun mujhe hai daulat-e-kaunain haasil mire rab kaa karam hai aur main huun main apne aap ko pahchaantaa huun miraa apnaa bharam hai aur main huun yahi kyaa kam hai duniyaa-e-vafaa mein mujhe ehsaas-e-gham hai aur main huun kisi ki yaad kaa ehsaan hai mujh par sukun-e-dil baham hai aur main huun mujhe 'mahmud' koi Dar nahin hai miraa apnaa qalam hai aur main huun"