siyaah hai dil-e-giti siyaah-tar ho jaae — Rais Amrohvi

"bataa kyaa kyaa tujhe ai shauq-e-hairaan yaad aataa hai vo jaan-e-aarzu vo raahat-e-jaan yaad aataa hai pareshaan-khaatiri had se guzarti hai to vahshat ko kisi kaa aalam-e-zulf-e-pareshaan yaad aataa hai guzartaa hai kabhi jab chaudhvin kaa chaand badli se mahin aanchal mein un kaa ru-e-taabaan yaad aataa hai andheri raat mein jugnu chamakte hain to rah rah kar dupaTTe ke sitaaron kaa charaaghaan yaad aataa hai ufuq par phailti hain surkhiyaan jab subh-e-taaza ki koi siina pas-e-chaak-e-garebaan yaad aataa hai kali ko phuul bante dekh kar ahd-e-bahaaraan mein koi chehra bahut nau-khez-o-khandaan yaad aataa hai ghazal jab chheD detaa hai koi ahd-e-javaani ki kisi kaa jism-e-mauzun-o-ghazal-khvaan yaad aataa hai vo tufaan karvaTein letaa thaa jo ik jism-e-raaanaa mein vo tufaan ham-kinaari kaa vo tufaan yaad aataa hai vo armaan jo kisi ke shokh honTon par machaltaa thaa vo armaan bosa-e-lab kaa vo armaan yaad aataa hai vufur-e-shauq se khud haath apne chuum letaa huun vufur-e-shauq mein jab un kaa daamaan yaad aataa hai bahut kuchh yaad aataa hai 'rais' un ki judaai mein magar jaise koi khvaab-e-pareshaan yaad aataa hai"

"dayaar-e-shaahid-e-bilqis-adaa se aayaa huun main ik faqir huun shahr-e-sabaa se aayaa huun jahaan-e-nau ki talab aur is kharaabe mein savaad-e-istakhr-o-nainvaa se aayaa huun shab-e-siyaah-e-khizaan ke sumum-o-sar-sar tak nigaar-khaana-e-shubh-o-sabaa se aayaa huun abhi kahaan hai mujhe nauha-o-navaa kaa shuur ki ek naahiya-e-be-navaa se aayaa huun mire rumuz kaa irfaan kise nasib ki main sarosh-e-ruh-e-azal huun samaa se aayaa huun damak rahi hai zamaan-o-makaan ki peshaani sitaara-e-abadi huun khalaa se aayaa huun tumhaare ghuncha-o-gul se gharaz nahin mujh ko idhar ishaara-e-baad-e-sabaa se aayaa huun"

"ye faqat shorish-e-havaa to nahin koi mujh ko pukaartaa to nahin bol ai akhtar-e-ghunuda-e-subh koi raaton ko jaagtaa to nahin sun ki ye madd-o-jazr-e-saahil-e-bahr maajraaon kaa maajraa to nahin zehn par ek khurduri si lakir kankhajure kaa raastaa to nahin ret par chaDh rahi hai ret ki tah baabul o misr o nainvaa to nahin nok-e-har-khaar-o-khas hai khun-aalud ruh-e-sahraa barahna-paa to nahin ai miri jaan-e-mubtalaa ke sukun tu koi jaan-e-mubtalaa to nahin tere jism-e-hasin mein khvaabida baagh-e-jannat kaa azhdahaa to nahin"

"tiraa khayaal ki khvaabon mein jin se hai khushbu vo khvaab jin mein miraa paikar-e-khayaal hai tu sataa rahi hain mujhe bachpane ki kuchh yaadein vo garmiyon ke shab-o-roz dopahar ki vo lu pachaas saal ki yaadon ke naqsh aur naqshe vo koi nisf sadi qabl kaa zamaana-e-hu vo garm-o-khushk mahine vo jeTh vo baisaakh ki haafize mein kabhi aah hain kabhi aansu vo zaaein zaaein ke kitne muhib zanaaTe? fazaa kaa haul havaa ki vo vahshatein har su vo saaein saaein ke kitne ajiib sannaaTe? vo sansani vo pur-asraar ek aalam-e-hu vo dopahar vo habuDe vo seingi baai kuuT fazaa-e-shoala-bajaan o havaa-e-aatish-e-khu vo khiDkiyon mein havaaon ki sar-kashi tundi vo baam-o-dar pe musallat jahannami jaadu vo pech-o-taab bagulon kaa mere aangan main chuDelein ghar mein ghus aai hain khaul kar gesu vo lu kaa zor ki saare kivaaD bajte hain ki jaise lashkar-e-jinnaat kaa amal har su vo shor jaise bagulon mein bhuut hon raqsaan vo qaah-qaah vo haa-haa vo honk vo hu-hu guzar rahaa hai tasavvur se jeTh kaa mausam aur is samay mein mujhe yaad aa rahaa hai tu"

"'rais' ham jo su-e-kucha-e-habib chale hamaare saath hazaaron balaa-nasib chale rafaaqaton ki saaadat liye rafiq aae raqaabaton ki nahusat liye raqib chale jo qaafile ki hamaari talab mein nikle the kabhi baiid se guzre kabhi qarib chale aqab mein haadisa-e-subh-o-shaam ke ifrit jilau mein gardish-e-ayyaam ke naqib chale jahaan ko jin ke nasibe pe rashk aataa thaa nikal ke apne gharon se vo bad-nasib chale ye chal-chalaav ajib-o-gharib thaa ai dost gharib log su-e-aalam-e-ajib chale"

"gard mein aT rahe hain ehsaasaat dhime dhime baras rahi hai raat jal uThaa ik charaagh-e-shaam to kyaa bujh gae be-shumaar imkaanaat haae maazi ki dil-nashin yaadein haae khunkhaar bheDiyon ki baraat chyunTiyaan jaise zehan par reingein uf ye mere latif ehsaasaat bhuut ban kar mujhe Daraati rahin meri naa-aafrida takhliqaat kaun aayaa mire taaaqub mein vahi fikr-o-khayaal ke jinnaat dafatan kis ne qahqaha maaraa ye andhere mein kaun hai mire saat sarsar-e-shab kahaan ki patton mein karb-e-gham se karaahti hai hayaat mujh se mujh ko na chhin kar le jaae shaahzaadi-e-kishvar-e-zulmaat subh jaagaa to yaad bhi na rahaa raat thi chaandni ki chaandni raat tuda-e-reg o nakhl-e-khushk-e-chinaar chhup gai kis ki oT mein barsaat ye darakht-e-kuhan lisaan-ul-ghaib aur ye shaakh-e-khushk barg-e-nabaat kyaa yahi hai 'rais'-amrohvi uD ke aae hain duur se zarraat"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"