jahaan pahunch ke qadam Dagmagaae hain sab ke — Aabid Adeeb

jinhein ye fikr nahin sar rahe rahe na rahe
vo sach hi kahte hain jab bolne pe aate hain

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

safar mein aise kai marhale bhi aate hain
har ek moD pe kuchh log chhuT jaate hain

amir-e-kaarvaan hai tang ham se
hamaaraa raastaa sab se alag hai

ham se 'aabid' apne rahbar ko shikaayat ye rahi
aankh munde un ke pichhe chalne vaale ham nahin